„Dabasu Durovys” prīcēs Reigys i Jelgovys fanus

LaKuGa 13. Janvars, 2013. gods Comments Off on „Dabasu Durovys” prīcēs Reigys i Jelgovys fanus
„Dabasu Durovys” prīcēs Reigys i Jelgovys fanus

„Dabasu Durovys” īprīcynuos ari Reigys i Jelgovys fanus ar jaunuo albuma „Styklu vītā skaņa” prezentacejis koncertim. 16. janvarī „Dabasu Durovys” uzastuos „Jelgovys kraklūs, bet 17. janvarī – klubā „DEPO”.

Sovu dīnys gaismu „Dabasu Durovu” ūtrais albums „Styklu vītā skaņa” īraudzeja paguojušuo goda nūgalē, kod albums tyka prezentāts Daugovpilī. Muzykys albumā īkļautys 14 kompozicejis latgalīšu, latvīšu i angļu volūdā. Albuma nūsaukums roduos, īsaspaidojūt nu idejis, ka pasauli var redzēt na tik vizuali, nu ari caur skonu.

Jelgovā pyrms koncerta 21 stuņdē 6. dīnasta vīsneicā (Pītera īlā 1-235) „Dabasu Dorovu” cīneituoji ir aicynuoti iz sarunu ar grupu, kluotasūšajim byus īspieja grupys dalinīkim izdūt sev interesejušūs vaicuojumus. Sarunys dalinīkus gaida eipašs puorsteigums – jim īeja „Kraklūs” byus bez moksys. Bet 24 stuņdēs grupa kuops iz „Jelgovys kraklu” (Leluo īla 19a) skotivis i klauseituojus prīcēs ar sovom dzīsmem. Jelgovys koncerts teik organizāts ar bīdreibys „Latgolys Studentu centrs” atbolstu, kai ari kluotasūšajim byus pīejams LgSC suveniru stends – uzleimis, nūzeimeitis i karūdzeņi ar Latgolys symboliku, kai ari cyti suveniri. Paruodūt studenta aplīceibu, koncertā īeja 1 Ls.

Reigys koncerts nūtiks klubā „DEPO” (Vaļņu īla 32) 21 stuņdē. Kai eipašī gosti Reigys koncertā uzastuos Evija Smagare & band i „Green Novice” nu Latvejis i James Botterill nu Anglejis. Īeja koncertā 2,00 Ls.

Karteņa: Fragments nu „Dabasu Durovu” albuma vuoceņa
Ziņu sagataveja: LaKuGa

Komentari slāgti.