Bolvu ķēniņam beja vīns vīnīgs dāls. Tys gribēja jemt sīvu, bet navarēja atrost meitas, kas byutu pēc jo pruota. Vīnai taida vaina, ūtrai taida. Valdinīks pavēlēja atvest vysas valsts jaunavas un stuodīt dālam prīškā. Atvedja, bet panuokuma nikaida nabeja. Nivīna jaunava napatyka kēniņa dālam. Reiz kēniņa dāls juoja pa mežu un dūmuoja par tū, kai sev sīvu atrost. Te jis īraudzēja jaunavu boltu kai mēneša gaismu, skaistu kai boltu rūzi. Jaunekļam meita uzreiža īpatyka. Taidas, tik breinišķi skaistas viņš nikod nabeja redzējis, ari na puosokā dzierdējis. “Kas esi taida?” jis vaicuoja. “Nuoc, es jemšu tevi par sīvu. Asmu Bolvu kēniņa dāls.” — “Lobpruot tū darīšu,” jaunava atteicja. “Ej uz muoju, sareikoj kuozas. Kod vyss byus gotovs, tod pi tevis aizīšu un tūlaik ar pateikšu, kas taida asmu.” Labi. Kēniņa dāls aizasteidzja uz pili un paziņuoja tāvam, ka sīvu atradis.

Pusgoda reikuoja kuozas. Atvedja gordus vīnus, darēja olu, gotovuoja vyskaidus ēdīnus, lyudzja cīnējamus vīsus. Kod vyss beja gotovs, gaidēja bryuti atejūt. Nabeja ar’ ilgi juogaida. Bryute īnuocja pilī, kai nu gaisa nūkrytusja. Kēniņa dāls aicynuoja bryuti pi sevis, lai jai duovynuotu duorgas rūtas un vyskaidas duovanas, bet bryute aizalīdzja. “Man ar tevi pyrmuok kas juoparunoj. Īsim uz piles golu. Es jau ar vēl naasmu tev pateikusi, kas taida asmu.” Aizguoja jī obi uz piles golu. Tī auga skaisti kūki un zīdēja izmaklātas puķes. “Jem luopstu un rūc šitajā vītā!” teicja jaunava kēniņa dālam, nūruodīdama uz vīnu vītu. Kū darīt? Bryutes juoklausa. Pajēmja luopstu un suocja rokt. Roka, roka, uzroka palnus un zam palnim mirūņa kaulus “Tu navarēji sev bryutes izmeklēt,” teicja jaunava. “Un tys par tū, ka tovs tāva tāvs padarēja nalaimīgu jaunavu, ko kaulus tu šite izroki. Tu īmīļuoji mani, un es šūdiņ atnuocu pi tevis, lai jemtu tevi sev leidza. Es asmu nuove un tev šūdiņ juomierst.” Kod izguoja kuozu vīsi, jī atroda kēniņa dālu nūmirušu uz izroktajim mirūņa kaulim. Bryute beja kai yudenī īkrytuse. Kuozu vītā pīsanuocja nūsvētīt bēres.

Karteņa: LaKuGys arhivs