Aizvadeitajā sastdīnē Reigys latgalīšu bīdreibā „Trešuo zvaigzne” nūtyka Emilejis Kalvānis dzejūļu kruojuma „Atvosora” svātki – dzimšonys dīna ar autoris tekstim i klingeri. „Atvosora” ir Emilejis Kalvānis ūtrei gruomota. Tei ir dzeivis gudra i vysakuo dzeivē pīredziejuša cylvāka raksteita dzeja. Te sūpluok ir i bierneibys atminis, i naatdūta poruoda tyvajim i sovai Latgolai sajiuta, ir ari mīlesteiba i atziņa, ka „mīlesteiba nanūvecej, viņ ar godim vairuok zyna”, ir i gryutuo nūlicīņa nosta i juos paceļšona.

Dzejneicu varēs satikt ari itamā sastdīnē Latvejis Gruomotu svātkūs 17 stuņdēs Kīpsolys izstuožu hallē.

Īskotam dažys šaļtenis nu sastdīnis pasuokuma.

Kartenis: Ilze Sperga
Ziņu sagataveja: LaKuGa