Nav daudz taidu latagalīšu pasuokumu kas nūtyktu nu goda godā bez puortraukumim. Vīns nu taidim jau vairuoku godu garumā ir „Latgolys Studentu centra” reikuotais literarais i atraktivais pasuokums sovejim i sovejūs sovejim Viļānu pusē – „Tievanānu pavasars”.

Itūgod „Tievanānu pavasars” ir palics vēļ daudzveideiguoks, nu 6. leidz 9. juņam pasuokuma gaitā nūtiks jaunūs literatu škola, kurys laikā jaunīši pylnveiduos sovys literaruos prasmis, diskutēs i pīsadaleis kūpejuos performaņcēs ar jau pīredzis boguotajim latgalīšu ailinīkim. Tūmār pasuokuma ideja godu gaitā palīk namaineiga – puļcēt vīnā vītā latgalīšu literaturys autorus i skaiteituojus, kab napīspīstā atmosferā klauseitūs i skaiteitu dzeju i prozu latgaliski. Par tū vysi interesenti tiks gaideiti Tievanānūs (Jaunviļānūs) 8. i 9. junī, lai kūpā ar apvuiceibu dalinīkim i cytim gostim skaiteitu dzeju i prozu latgaliski, dūtūs guojīnī leidz Trūpu Valna akmiņam, ūtrajā reitā – iz Viļānu tiergu. Bez tuo vysa byus vēļ ari cytys naiztryukstūšys pasuokuma aktivitatis.

Vaira par pasuokumu var dazynuot pi Dagnejis (lgsc@lgsc.lv; t. 28362243)

Ziņu sagataveja: LaKuGa