Itūreiz nūtikšona nabeja tradicionala albuma prezentaceja deļ tuo, ka grupa izavieliejuse īrokstu izdūt viņ vīnā eksemplarā i magnetiskuos lentys formā. „Bez PVN” dūmoj, ka myusu dīnuos taipat taustamim formatim nav jāgys i albums dzeivoj digitalu dzeivi. Albumā „Reits” atrūnomys 10 dzīsmis, kuru tekstu i muzykys autori ir grupys dalinīki. Vīnys dzīsmis „Grybu dzeivuot” teksta autors ir Ontons Slišans i prezentacejis laikā ari jam tyka syuteiti sveicīni iz dabasu koncertzalu. Gabaleņu magnetiskuos lentys sovā eipašumā varieja dabuot ari kotrs grybātuojs.

Vysa vokora gaitā vaļdeja taida prīceigys dzierksts atmosfera – jaunuos i senejuokys dzīsmis, saguojušūs vaicuojumi, grupys dalinīku montu torgi, apsveikumi i smīkli. Tai kai latgalīšu grupom jaunu albumu izdūšona nav kasdīnys nūtikšona, puiši ir prīceiga, ka iz „Bez PVN” svātku dīnu beja saguojuši tik daudz gosti. Grupys sveicieju vydā beja „Borowa Mc”, „Green Novice”, „Inde Indive” puorstuovi. Eipaši saviļņuojūšs breids beja sveicīņs nu Kristapa Rasima kursabīdrim i Dailis teatra kolegim.

Jaunū albumu grupa kotram grybātuojam duovynuos nūsaceiti bez moksys – preteimā gaida kaids grupys sagataveits aizdavums. Albumam var dasasaceit, rokstūt iz bezpvn@inbox.lv. „Reitu” nūsaklauseit var jau tāņ, bet sev digitalajā formatā tū varēs dabuot suocūt ar pyrmūdīni.

Klips dzīsmei „Tylts”, vizualuos puormainis sātyslopā i albums „Reits” nav vīneigī grupys „Bez PVN” jaunumi itymā godā. Dreiži gaidoms vēļ vīns videoklips i zynoms, ka da jauna albuma izīšonai nūteikti nabyus juogaida seši godi.

Vaira par „Bez PVN” verīs i albumu klausīs http://bezpvn.lv

[soundcloud url=”http://api.soundcloud.com/playlists/6478827″ params=”color=4fad16&auto_play=false&show_artwork=true&show_playcount=true&show_comments=true” width=” 100%” height=”165″ iframe=”false” /]

Sagataveja: LaKuGa
Kartenis nu grupys „Bez PVN” arhiva