Nūtiks muzykys festivals „Osvalds 2013”

Nūtiks muzykys festivals „Osvalds 2013”

Jau 18. reizi Baļtinovā tiks reikuots muzykys festivals „Osvalds” – itūgod 3. augustā. Tradicionali festivalā byus īspieja vīnlaiceigi baudeit dažaidus muzykys stilus, darbeiba nūtiks iz 3 skotuvem.

„Tradicionaluo” skotuve byus dūmuota šlāgera i pop muzykys cīneituojim. Itī muzykys žanri ir vysilguok „Osvaldā” pastuovušī i deļtuo aizjam centralū vītu. Itūgod iz „Tradicionaluos” skotuvis uzastuos gitarists „Greg” ar blūza, pop i rock klasikys skaņdorbu programmu. Tod sekuos LNT dzīdūšūs saimu šova dalinīki – smaideiguo Laicānu saime gon ar šovā izpiļdeitom, gon ar jaunom dzīsmem. Turpynuojumā par šlāgera i country nūskaņom ryupēsīs grupa „Muiža” i „Rikardions”, kai ari sovu pozitivūs emoceju daļu pīduovuos Nikolajs Puzikovs i grupa „Ginc un Es”. Ituos skotuvis beigu daļā izskanēs grupa „Karburators” i grupys „Otto” solists J. Ķirsons. Programmys vadeituojs – Latvejis radejis 2 Dj Aivis.

„Elektroniskuos muzykys” skotuve itūgod teik puorcalta nu tradicionaluos nūrisis vītys vacajā kolhoza pyunē iz breivdobu. Golvonūkuort tys saistuos ar pīduovuojumu pyrmūreiz „Osvalda” laikā baudeit na tikai Dj snīgumu, bet ari paraleli pīsadaleit jautrā izklaidis pasuokumā – putu balleitē. Centraluo gosta statusu iz ituos skotuvis itūgod ījims Dj Mārtiņš Kreilis, kai ari Dj Čivix, Dj Barik, Dj Andre White, Dj Trump (XS night club), DJ POsitive.

Zynoms jaunums itūgod byus „Jaunuos” skotuvis atdzimšona piec 5 godu puortraukuma, byus īspieja baudeit nadaudz alternativuoku muzyku. Iz ituos skotuvis uzastuos jaunuo grupa nu Bolvu „Elektrolīts”, pop rock/alternative grupa „Neon Saturdays”, pop-punk/hardcore punk grupa „Double Blast Heroes”. Prūtams, natiks aizmiersts ari par Latgolys muzyku, tū puorstuovēs grupa „Peec Lietus” i Sovvaļnīks. Vēļ, dūmojams, publikai varātu byut interesanta tikšonuos ar Latvejis hip hop zvaigzni Ūzulu (Ozolu). Sovukuort programmu vadeis Aigars Runčis (Borowa MC).

Festivala „Osvalds 2013” nūrisis laiks: 3. augusts nu 20:00 leidz 4:00. Beletu cena: īprīkšpuordūšonā 3,50 Ls, iz vītys 5,00 Ls. Beleti nūpierkami: www.bilesuparadize.lv ci nu 15. juļa Bolvu Kulturys i atpyutys centrā.

 Osvalds 2011

Karteņa: Festivals “Osvalds” 2011. godā, diogens.lv
Ziņu sagataveja: LaKuGa piec pasuokuma organizatoru informacejis

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]