Aiztaisit acs i īsadūmojit taidu vītu, kurā jiutitēs vyslobuok. Vītu, kurā varit byut vīnā vasalumā ar dobu, taidu vītu, kur vyss pateik, i tys jius padora laimeigu!” tai īsacuoce permakulturys kurss Daugavpiļs nūvoda Ambeļu pogosta kulturys nomā. Seminars ilga četrys dīnys – nu 14. leidz 17. novembram, tymā pīsadaleja 21 pastuoveigais dalinīks i 5 dalinīki nūsaklauseja atseviškis, tikai sev interesejūšys temys. Kursu vadeja Jans Bangs – Norvegejis Permakulturys asociacejis vadeituojs. Kursa dalinīki roda īskotu permakulturys pamatprincypūs, tymā, kas tod eisti ir ekologisks dzeivis veids, kai piec īspiejis apzineiguok izmontuot dobys resursus. Pieteja dobys muotis radeitū – kū varātu iz prīšku apzynuotai izmontuot sovuos saimnīkuošonys vītuos (pat dzeivūkļūs), rodūt produktivu ekologiskū ainovu. Seminars puorsavierte eistā ideju vātrā, kursanti dalejuos sovā pīredzē i atroda idejis, kurys teiri praktiski raudzeis realizēt dzeivē.

Dalinīki guoja pi atzinis, ka saimnīkuošona saskaņā ar dobys procesim, kurus tymā storpā īvāruoja ari myusu senči na tik tuolā paguotnē, ir aizraujūša i interesanta. Tei ir kai cylvāka i dobys saspiele, kas nakaitej dobai, bet dora tū augleigu i kūšu. Vysim dalinīkim seminara nūslāgumā tyka dūts aizdavums izveiduot sovu dizaina projektu, izmontojūt permakulturys princypus, dabuotuos zynuošonys. Dizaina projekts seminara ūtrajā daļā aprelī byus juoprezentej, piec tam tiks izsnīgts ari sertifikats.

Kai izasaceja poša projekta koordinatore „Kulturys studejis Speiga” vadeituoja Ilze Mežniece: „Cylvāki, kuri pīsadaleja seminarā, beja nu tik plašom kompetenču zonom, ka kūpā jī veidova taidu kai vīnu superkompetentu sabīdriskū organismu, i, ka jī ari tuoļuok sasadorbuos vīns ar ūtru, tod radeis tik teišom lobus i vajadzeigus rysynojumus Latvejis lauku videi.”

Pasuokums tyka realizāts Sabīdreibys integracejis fonda i Islandis, Norvegejis, Lihtenšteinys finanšu instrumenta atbaļsteituo projekta „Bīdreibys „Kulturys studeja Speiga” programma Latgalis lauku ilgtspiejis veicinuošanai” gaitā.

Ziņu sagataveja: „Kulturys studeja Speiga”
Karteņa: „Kulturys studeja Speiga”