Andrejdīna – tradiceja 15 godu garumā

Andrejdīna – tradiceja 15 godu garumā

30. novembrī Rēzeknis piļsātys kulturys nomā nūtyka kasgadejais literari muzikalais  pasuocīņs – Andrejdīna, kas dzejis mīļuotuojus puļcēja jau pīcpadsmitū reizi.

Ituo goda pasuocīņa programa beja pakuortuota divim Rēzeknis Augstškolys (RA) izdavumim. Par gūdu augstškolys 20 godu jubilejam marta mienesī tyka izsludynuots literarūs dorbu konkurss, kurā sovus radūšūs veikumus varēja īsyuteit gan asūšī, gan ari bejušī studenti. Īsyuteitūs dorbus skaiteja kompetenta žureja, kurys sastuovā beja dzejneica, žurnaliste Anna Rancāne, dzejnīks, Daugavpiļs Universitatis docents Valentins Lukaševičs, RA zynuotņu prorektore, literaturzinuotneica Ilga Šuplinska, RA pietneica, literaturzinuotneica Sandra Ratniece i RA Sabīdriskūs attīceibu nūdalis vadeituoja Lolita Kivleniece-Kuzņecova. 19 literatu dorbi tyka apkūpuoti kūpkruojumā Pīturys punkti bez pīturu”, kas tyka prezentāts Andrejdīnys pasuocīnī, naaizmierstūt ari par pošu autoru dzejis un prozys skaitejumim. Gruomotā atrūnami gon sabīdreibā jau zinomu literatu (Līga Seiksta, Līga Rundāne, Ineta Atpile-Jugane, Betija Berga, Raibīs Suņs u.c.), gon ari jaunū censūņu (Māreite Krasnobaja, Inga Kaļva, Ilze Elizabete Vaivode, Ausma Sprukte, Gita Nagle i c.) dorbi.

Kai jau īrosts, ari itūreiz naiztyka bez Andrejdīnis bolvys. Žūreja un pasuocīņa dalinīki par lobuokū atzina Līgu Seikstu. Juopībylst, ka taišni jei beja iniciatore tam, ka 2001. godā tyka īdybynuota itei tradiceja.

Apmaklātuoji varēja īsavērt ari ūtrā RA izdavumā DVD „Kaunatys vītu vuordu stuosti”, kas ir bilingvals izzinis i vuiceibu materials. Tys paradzāts školom, bibliotekom, muzejim, taipat sevkuram interesentam. Itys DVD turpynoj RA ekspediceju materialu cyklu par folklorys nūzeimi myusu dīnuos, atkluoj Kaunatys pogostam rakstureigū folkloru, tradicejis, kai ari paruoda vītejūs īdzeivuotuoju attīksmi pret sovu dzymtū vītu. Diska materials savuokts 2012. goda folklorys ekspedicejis laikā.

Andrejdīnys vokoru nūslēdze kūpeiga vīnuošonuos dejā ar projekta „Lelvuordis jūstys dejis roksti” vadeituoju Ernestu Spīču i deju kūpu „Dziga”. Jūstys rokstus īvadeja Guņs i Vieja dejis paraugdemonstriejums, kam sekuoja Riņča, Jūstys ausšonys i Leikumu dejis. Sevkurs varēja sajust sev tyvuokū ornamentu i saprast, cik lelā mārā praktiskūs dorbus senejais latvīts ir prats izmontuot pasaulis izpratnei i sakuortuošonai. Syltū nūskaņu pastyprynuoja kūklineicys Rūzeitis Katrīnys Spīčys muzikalais snīgums.

Beigu daļā vysi pasuocīņa apmaklātuoji tyka aicynuoti iz svātku torta nūbaudeišonu i sirsneigom sarunom.

Andrejdīna Rēzeknē teik organizāta nu 1998. goda. Pasuocīņa idejis autoris ir Ilga Šuplinska i Angelika Juško-Štekele. Andrejdīna dūd unikalu īspieju baudeit dzeju, muzyku i izdzeivuot folkloriskuos tradicejis vīnuvīt.

Juosoka paļdis par pasuocīņa reikuošonu i finansialu atbaļstiešonu RA i Rēzeknis Latgalīšu kulturys bīdreibai.

IMG_4202

IMG_4222

IMG_4284

 IMG_4329

IMG_4421

IMG_4473
Viesti sagatavēja: Juleja Sprukte.
Kartenis: pasuokuma organizatoru publicitatis foto

Nūtikšonu kalendars