Zīmyssvātku ailenis

Zīmyssvātku ailenis
LaKuGa sovim skaiteituojim pīduovoj Zīmyssvātku ailenis. Tuos uzraksteitys dažaidūs laikūs i saglobuota autora laika volūda.

Ivāns

Zīmassvātku egleite

Šudiņ bārnim lelōkī svātki –
Skaistōkī, jautrōkī breiži ir klōt!
Lobōkōs drēbeitēs visi ir tārpti-
Greznōtū egleiti gūdam var sōkt.

Dagūšūs sveceišu breineigā līsmā
Atmirdz vyzūšī prīkšmati, lītas;
Skaneigūs baļsteņu jaukajā dzīsmā
Augstdzymušam Bārnam jyut dvēseles sītas.

Pēc dzīsmem nōk puiškini, meitines boltas –
Vysskaistōkūs dzejuļus atbiļdēt mōk;
Atkausej, saviļņoj dvēseles soltas –
Dīvam un taisneibai aicynoj tyvōk.

Programas goboli jōbeidz tad vīn,
Jo rūtaļu, deju prīkšā vēļ daudz;
Pi garšeigu dōvonu kōrbom aizvīn
Zīmsvātku veceits aicynoj, sauc.

Prīceigi, jautri, kai putneni jauki,
Bārni pēc egleites mōjōs tad skrīn;
Dvēseles pylnas, kai dōrgajī trauki, –
Svātōkōs jyutas ar Dīvu jūs sīn.

*

Jurs Pabērzs

Zīma

Zīma – skuma, dryuma, solta.
Gaisā, kreitūt, grīžās snīgs.
Doba guļ zem deča bolta –
Vysur gryutais zīmas mīgs!

Solti, solti saules stori,
Pyuš oss vējš nu zīmelim,
Gauži nūšolc bārza zori
Pakaļ styprim ūzulim.

Kūki plyki. Snīgā kryumi.
Soltums strautu ladā kaļ.
Vysur skumeigi un dryumi:
Doba snīgā, doba saļ…

Snīgā dryvas, plotī lauki.
Snīgā zaļō zōleite.
Veita pukes, zīdi jaukī.
Klusa putnu dzīsmeite.

Dzysa jautrums, prīka līsma.
Puškus nasīn dzaltones.
Naskan mīlesteibas dzīsma.
Ryma daiņas, gaviles…

Nava dzeives dobā klusā.
Tikai čirkst zam kōjom snīgs.
Jautrums, prīki – zīmas dusā:
Vysur klusums, vysur mīgs…

Pasaver… Un dūmas gryutas
Tevī dzymst. Sirds skumē grymst.
Pyušās gryuti… Apdzīst jyutas,
Prōts nu šaubom naaprymst…

Un tu vaicoj: Voi jau dreiži
Prūjom īs šys soltais laiks?
Voi vēļ atnōks jauki brieži,–
Vyss, kas beja dōrgs un maigs?

Voi vēļ paspeiss saules stori
Spūdrōki un meilōki?
Voi byus bārzam lopos zori?
Voi pyuss vēji syltōki?

Voi pa pļovom, lejom, laukim,
Zaļōs zōle, maureni?
Voi ar bolsim spolgim, jaukim
Prīcynōs myus putneni?

Voi vēļ skanēs prīka dzīsma?
Voi sīs puškus meitines?
Un voi mīlesteibas līsma
Siļdeis viņu sirsneņas?

Voi tys byus vēļ?– vaicoj sevi…
Un tu jyut: vyss apkōrt saļ.
Soltums kerās ar pi tevis,
Solda sirdi, ladā kaļ…

/1914. gods/

*

Karūdznīks

Zīma

Bīzi ladi, dziļi snīgi
Azarus i kolnus sadz.
Garys naktis, dzili mīgi,
Saulis spaitu reši radz.

Zīmys debess soltu dvašu
Sylta zemis kryuti dvieš.
Styngim pierkstim boltu sagšu
Sorma kūku zorus plieš.

Tai kai rudzu teirums zīmā
Zaļuot snīgā nanūstoj,
Ari cylvāks sāta, cīma
Rūsas, doras – nanūstoj.

Gaida saulis atliekšonys
Kotra dzeiva, korsta sirds!
Gaida sovys atdzimšonys
Myusu nuokomuotuo cilts.

/08.06.72./

*

Jurs Pabērzs

Trejs zvaigznes

Zvaigznes trejs zam padebešim
Breinumgaismā uzlēce.
Div nu tom kai eistas mōsas
Daga vīnā spūžumā.
Tōļok vīna treša zvaigzne
Daga gaismā bōlokā;
Tyvōjōs tei cytom divom,
Lai byut viņom leidzeiga…
Cēlēs vēji. Kauce auka.
Līcēs zaļas bērstales.
Lyuza prīdes. Kryta egles.
Gōzēs styprī ūzuli.
Šņōcūt, krocūt, vysu laužūt,
Vysu pūstā pōrvēršūt,
Malnas aukas padebeši
Move šur nu vokorim.
Pretim vinim, taipat krōcūt,
Taipat pūstu atnasūt,
Vērzūtīs nu reita puses
Plyuda ašņa mōkūni.
Vini kloja debess molu,
Slēpe saules gaismeņu.
Sorkonmalnūs padebešūs
Gryma zvaigžņu spūdrumeņš.
Zvaigznes ceinējōs ar auku,
Gōja karā nōveigā,
Sovus bārnus – gunis dzērkstes
Syutēja pret mōkūnim
Nōves kaujā zvaigžņu bārni
Aukas spāku salauze:
Dzyna malnūs padebešus,
Sakōva ar’ sorkonūs.
Zvaigznes nyu kai eistas mōsas,
Vysas trejas vīnaidas,
Augši zylūs padebešus
Breinumgaismā spūži speid.
Breinumzvaigzneites tōs ira
Apvīnōtō Latvija:
Kūrzemeite, Vidzemeite,
Latgaleite burveigō.

/1920. gods/

 

Karteņa: LaKuGys arhivs

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]