Nūsasliedzīs folklorys vuokuma konkurss „Apleicīne 3”

Nūsasliedzīs folklorys vuokuma konkurss „Apleicīne 3”

„Aug bārni man./ Munu volūdu runoj,/ Naizsmej sōpu./ Kūpā ar mani dzīd/ Tautasdzīsmi./ Aug bārni man./ Tū dūmu dūmoj,/ Kas mōtei ryup./ Maizi tur svātu,/ Par dorbu navaidūt./ Aug bārni man./ Klausōs klusuma vōrdūs,/ Skaļuma tyuškumu jau/ I, verūtīs ceļam iz prīšku,/ Nasakaun redzēt atpakaļ./ Aug bārni man…tai Ontons Slišāns roksta vīnā nu sovim dzejūlim „Ko vairōk man vāg!”.

Taipat kai īprīkšejūs divejūs godūs, tai ari itūgod tyka reikuots Latgolys folkorys vuokuma konkurss „APLEICĪNE 3”, kas namaineigi tyka veļteits nūvoda folklorys vuocieju aktiviziešonai i Ontona Slišāna dzeiviszinis pīminiešonai. Konkursa organizatori ir Bolvu Centraluo biblioteka sadarbeibā ar Bolvu nūvoda pošvaļdeibu, Vileks nūvoda dūmi, Rēzeknis Augstškolys Humanitarūs zynuotņu katedru, Latgolys Regionalū televizeju.

Vuokumu konkursā tradicionali varēja pīsadaleit sevkurs Latvejis īdzeivuotuojs, kurs vuoc Latgolys nūvodu folkloru, kurs savuocs sovys dzymtuos apleicīnis ci kaidys cytys Latgolys vītys sovpateigū, lokalū folklorys kluostu.

Puorsaverūt īprīkšejūs divejūs godūs īsyuteitūs dorbus, ruodejuos, ka jau vyss ir savuokts i izpieteits, kū nu vairs. Taču, kai jau vīnmār, ari ituo goda konkursa dorbi pateikami puorsteidze viertēšonys komiseju – Andri Kazinovski (Bolvu nūvoda dūmis prīšksādātuoju), Ilgu Šuplinsku (Dr. philol. asoc. Rēzeknis augstškolys asociātū profesori), Annu Rancāni (Latgolys Regionaluos televizejis ziņu dīnasta vadeituoju), Andri Slišānu (Upeitis tautys noma vadeituoju) – ar vēļ nadzierdātom i breineigom folklorys pierlem.

Izviertēšonai sovus dorbus beja īsyutiejuši 7 dalinīki gon nu Bolvu, gon Vileks nūvoda, kai ari nu Reigys. Ar daudzim dalinīkim tei ir meila otkolsaredzēšona nu īprīkšejim godim, daži ir nuokuši kluot nu jauna, par kū vēļ leluoka prīca. Itūgod skaitliski leluokais pīnasums ir īsyuteituos apdzīduošonys dzīsmis, kas izaceļ ar sovu pikantumu i lobsirdeigū, latgalīšim rakstureigū, jestrū humora devu, kaut voi: „Nadūd Dīvs taidys solnys,/ Kaida solna šūnaksneņ/ Pīteram nabogam/ Puse motu nūsoluse,” i „Šmuka, šmuka tei Mareite/ Aiz šmukuma navarieju/ Man nūtryuka biksem pūga,/ Iz tevim verūtīs.” Naizpalyka ari tautysdzīsmis, meiklis, nūstuosti, ticiejumi i c.

Laureatu vydā ir Aijis Locānis īsnīgtais Anitys Bernackys folklorys vuokums „Vecumu bibliotēkas mikrorajona folklora” (Vacumu pog.), Lucijis Ercikys folklorys vuokums (Škilbānu pog.), Annys Griestinis vuokums „Bērzpils apleicīnes teicējas Anna Kindzule, Elizabete Šodnaka, Tamāra Zelča i jūs folklorys krōjumeņš” (Bierzpiļs pog.), Daigys Keišys folklorys vuokums (Škilbānu pog.), Māreitis Slišānis vuokums „Vīnas sīvas stuosts. Par Rozāliju Slišāni” (Reiga), Lindys Veitūlys folklorys vuokums „Sakasneiši – 2” (Tiļža), Brīžucīma pamatškolys latgalīšu puļceņa „Otuls” folklorys vuokums (Brīžucīma pog.).

Vysi īprīkš mynātī konkursa dalinīki tiks sumynuoti 28. decembrī desmit stuņdēs nu reita Bolvu Centrāluos bibliotekys zalā. Vāluok vysi teik aicynuoti dūtīs iz Škilbānu pogostu, kur 12.00 stuņdēs Brieksīnes kopūs īsvieteis pīminekli dzejnīkam Ontonam Slišānam. Vāluok 14.00 stuņdēs Upeitis Tautys nomā nūsarysynuos Ontona Slišāna 65 godu jubilejas atceres pasuokums „Ir meili te maņ, kur pasauļs vyss munā volūdā skaņ”.

Ziņu sagataveja: Sarmeite Vorza, Bolvu Centrāluo biblioteka:
Karteņa: LaKuGys arhivs

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]