Ari 2014. godā LaKuGa turpynuos dorbu

Portals lakuga.lv 31. Decembris, 2013. gods Comments Off on Ari 2014. godā LaKuGa turpynuos dorbu

vineta vilcane„Latgalīšu Kulturys Gazeta” jūprūjom ir pasaulī vīneigais tikai latgaliski rokstūšais interneta portals i ir palykuse par sova veida latgalīšu puļciešonuos vītu internetā, kur vysod var satikt kaidu pazeistamu, atrast kū sev nūdereigu i saistūšu. Portalu lakuga.lv nu 2007. goda uztur bīdreiba “Latgolys Studentu centrs”.

2014. goda pyrmajā pusē LaKuGys darbeibu atbaļsteis Vaļsts Kulturkapitala fonds, kai ari LgSC realizēs Nūdarbynuoteibys vaļsts aģenturys programu „Atbalsts jauniešu brīvprātīgajam darbam”, pīsaistūt paleigus pi portala satura sagataveišonys. Nuokamajā pusgodā paradzāts likt leluoku uzsvoru iz latgalīšu jaunradi – literaturu i muzyku, par tū aicynojam latgalīšus naturēt sveci zam pyura i pastuosteit puorejai Latgolai i Latvejai par sovu rodušū darbeibu. Taipoš aicynojam ari turpmuok sevkuru latgalīti īsyuteit rokstus par regiona kulturys vaicuojumim, aicynuot sabīdreibu iz diskuseju i kūpā meklēt variantus tuoluokai regiona kulturys atteisteibai.

Ar 2014. godu LaKuGā gaidomys puormainis, portalam byus jauna vadeituoja – entuziasma pylna i dareit grybūša studente, „Latgolys Studentu centra” bīdre Laura Melne.

Soku lelu PAĻDIS vysim par sadarbeibu aizvadeitajā godā. Lai Jaunais gods myusim vysim atnas jaunus izaicynuojumus i vareibu sasnīgt jaunys viersūtnis. Tikai nu myusim pošim ir atkareigs, kaida byus latgalīšu kultura i kaidus myusus redzēs puorejuo Latveja i pasauļs.

Sirsneibā,
Vineta Vilcāne
LaKuGys redaktore

 

Komentari slāgti.