LaKuGa jau īprīšk raksteja, ka nominacejom īsnāgti ari latgalīšu ci latgaliski dorbi. Niu ar prīcu varam paziņuot, ka piec žurejis izviertiešonys kandidatu iz bolvu vydā tykuši:

Lobuokais pop/rock albums nomināts grupys „Bez PVN” ūtrais albums „Reits”.

Lobuokais tautys muzykys albums nomināts Birutys Ūzulenis i DJ Monsta kūpdorbs „Sauli sēju”. Taipat itymā kategorejā nomināts myusdīnu tautys muzykys izlase „SVIESTS V”, kurymā ari ir vairuokys dzīsmis latgaliski.

Lobuokais alternativuos muzykys albums – bez puorsteigumim: nominacejis vydā ari Projekts „Kapļi” albums „Prauda par Madali”.

Svineiguo uzvarātuoju paziņuošona i bolvu padūšona byus 5. martā Latvejis Nacionalajā teatrī. Tod ari izzynuosim, ci kaids nu latgalīšu ci latgaliskajim dorbim dabuos Muzykys īrokstu goda bolvu par 2013. godā padareitū.

Muzykys īrokstu goda bolvai „Zelta Mikrofons”, kas īprīšk beja zynoma kai „Latvijas Mūzikas ierakstu Gada balva”, īsnāgti vaira kai 200 2013. goda īroksti, itūreiz bolvai tyka sataiseitys ari jaunys nominacejis. Vysi īsnāgtī īroksti tyka atdūti izviertiešonai žurejai 47 muzykys ekspertu sastuovā.

Karteņā – grupa “Bez PVN”.