Baļtinovā nūtics hokeja laukuma atkluošonys turnirs

Baļtinovā nūtics hokeja laukuma atkluošonys turnirs

26. janvarī nūtyka Baļtinovys hokeja laukuma atkluošonys turnirs. Sešu komandu konkurencē pyrmajuos treis vītuos īsarynduoja “Cyrma SK”, “Kuorsova” i “Baļtinova”.

Zīma itūgod ilgi nasasuoce ar sev rakstureigajim laikapstuoklim – soltumu i dziļu snīgu, partū hokeja sporta cieneituojim beja juopasacīš leidz lobvieleiguokim apstuoklim hokeja sezonys suokšonai. Gaisa temperaturai kliustūt zamuokai, beidzūt beja eistais laiks lada līšonai iz laukuma. Pasasokūt vītejūs jaunīšu iniciativai, ari Baļtinovys nūvodā beja gotovs hokeja laukums, partū 26. janvarī tykuos komandys „Brīžucīms”, „Kuorsova”, „Baļtinova”, „Cyrma SK”, „Vactilža”, „LĪGO”, lai sasacanstu Baļtinovys hokeja laukuma atkluošonys turnirā. Laikapstuokli spēlei beja pīmāruoti, bet juosoka, ka reizem snīga snigšona nadaudz apgryutynuoja spēlis gaitu, partū laukums tyka regulari teireits.

I spālātuojim, i komandu atbaļsteituojim vysys dīnys garumā beja īspieja siļdeitīs ar syltu čaju hokeja laukumam tyvu asūšajā Baļtinovys vydsškolys ādamzalā. Taipat natuoli nu hokeja laukuma vysu laiku daga gunkurs, kur spālātuoji siļdējēs spēļu storplaikūs. Ari atbaļsteiuoji soltumam napasadeve i leidza juta sovom komandom vysys dīnys garumā.

Piec spēlem komandys tyka apbolvuotys ar speciali turniram veiduotom trofejom. Kūpviertiejumā 1. vītu īgiva komanda „Cyrma SK”; par 2. vītu tyka apbolvuota komanda „Kuorsova” i 3. vītu īgiva „Baļtinova”. Par eipašim nūpalnim spēlis laikā tyka apbolvuots ari kotrys komandys lobuokais spālātuojs.

 Ziņa sagataveita piec Baļtinovys nūvoda pošvaļdeibys dūtuos informacejis