“Dabasu Durovys” aicynoj sovus atbaļsteituojus pīsavīnuot “Fanu reisam”

“Dabasu Durovys” aicynoj sovus atbaļsteituojus pīsavīnuot “Fanu reisam”

10. aprelī Tallinā, 11. aprelī Reigā i 12. aprelī Viļņā grupa “Dabasu Durovys” īsiļdeis par Lelbritanejis underground muzykys veterani sauktū Ayah Marar. Iz Viļņys koncertu brauks ari eipašs “Fanu reiss” nu Rēzeknis i Daugovpiļs. Par gaidomajim koncertim, kai ari cytim grupys planim vaicuojom “Dabasu Durovu” solistam Arņam Slobožaņinam.

Kai tykod pi taidys īspiejis koncertēt vysuos Baļtejis vaļstu golvyspiļsātuos?

Pavysam najauši. Laikā, kod bejam Reigā “D.FAB“, “Facebook” uzraksteja Aivars Līpenītis nu “IC concerts” un praseja – kur atsarūnam? Jam beja īpasatics interjers. Vuords pa vuordam vīnojomēs par sadarbeibu.

Koncertūs Baļtejis vaļstu golvyspiļsātuos uzastuosit ar programu angļu volūdā. Goda suokumā publika tyka īpazeistynuota ar “The Triads”, taipat zynoma ari jiusu dzīsme “White”. Kas vēļ paradzāts programā – tikai originaldzīsmis voi ari kaverversejis?

Tikai originaldzīsmis. Eisteneibā varu atkluot programu. Angliski tyka puortulkuotys “Pusnakts Triādis”, “Grēku fani”, “Par Martu”, “Maņ nav”, “Negaiss”, “Bildis&Skoti”, “Čajs ar madu”. Nav izslāgts, ka izpiļdeisim koč kū arī latgaliski, eipaši jau Reigys koncertā.

Voi vari pastuosteit koč kū vaira par Ayah Marar – muokslineicu, kurys īsiļdeituoji jius byusit?

Ka gūdeigi, nikuo daudzi nazynu, asmu nūsaklausejs puora juos dzīsmis. Bet, sprīžūt piec juos popularitatis (vīnam nu video Youtube ir vairuoki miļjoni skatejumu), ir vārts aizbraukt iz koncertu.

“Fanu reisus” parosti reikoj pasauļslavanu muziķu koncertim. Kaidys ir jiusu sajiutys par tū, ka taida īspieja ir dūta ari jiusu fanim?
Sajiutys lobys – tod jau redzēs, kai byus. Aicynoju myusu atbaļsteituojus izmontuot īspieju aizbraukt iz Viļņu – nanūžāluosit!

Jiusu “Fanu reisu” vadeis Evija Smagare i Edijs Jurēvics. Evija sabīdreibā ir vaira zynoma saisteibā ar sadarbeibu ar “Prāta Vētru”, Edijs dzierdāts mozuok. Pastuosti koč kū vaira par itim muzikim.

Ar Eviju asam pazeistami jau vairuokus godus. Vēļ pyrma sadarbeibys ar “Prāta Vētru”, juos dzīsme “Monday’s song” pyrma puora godim beja daudzu radiostaceju topu pyrmajuos vītuos. Tagad jei aktivi ir suokuse dorbu pi jaunu dzīšmu radeišonys, i dreižumā ceru sagaideit juos albumu. Edijs ir Evijis draugs, kurs dorbojās grupā “Crow Mother”. Jim napaseņ beja turs Londonā. Taids muzykals puoreits.

Martā pyrmatskaņuojumu pīdzeivuoja ari jiusu radeituo futbola komandys BFC “Daugavpils” himna. Kai roduos itei sadarbeiba?

Goda suokumā spēlējom Daugovpiļs sporta laureata pasuokumā, kur pīduovuojumu sataiseit himnu izsaceja BFC “Daugavpils” izpilddirektors Nauris Mackevičs. Ar Nauri jau īprīšk beja loba sadarbeiba. Piec juo uzaicynuojuma pyrma diveju godu “Dabasu Durovys” spēlēja LBL Zvaigžņu spēlē.

Kaidi vēļ ir grupys plani iz prīšku?
Kai soka muns draugs Aivars, golvonuo līta vysā ir ilgtspieja. Caru, ka “Dabasu Durovys” byus ari piec goda, diveju, pīcu i desmit. Nabyutu nikas pretī dorbuotīs leidzeigi kai “Rolling Stones” voi Pols Makartnijs, kuri, byudami jau puori 70 godim, turpynoj kvalitativi dorbuotīs muzykys lauceņā. Tyvuokajūs planūs īīt videoklipa uzjimšona i jaunys dzīsmis atruodeišona vēļ pyrma Baļtejis tura i tod septembra vydā ir paradzāts jauns albums. Dorbi pi tuo ir jau par 80% pabeigti,  jau ir nūteikti albuma prezentiešonys datumi i vītys, kai arī izdūmuots albuma nūsaukums. Pagaidom gon vēļ tū vysu paturiešu nūslāpumā.

Itūgod “Dabasu Durovys” pi “Boņuku” natyka, bet bolvys sajēme gon Arņa puorstuovātais “Projekts Kapļi”, gon Romāna projekts “Ze Pikniks”. Cylvākim, kas sekoj leidza nūtykumim Latgolā, “Kapļi” pavysam nūteikti ir dzierdāts, bet par “Ze Pikniks” leidz šam beja dzierdējs tikai ratais. Kas tod eistyn ir “Ze Pikniks”?

“Ze Pikniks” ir myusu gitarista Romāna grupa. Jam ir vasala skaudze ar dzīsmem i jam beja napīcīšams naz kai pošrealizētīs. “Ze Pikniks” ir taids sajaukums storp grunge, koledžroku i indie. Īsoku vysim pasaklauseit! Dzīsmis var atrast draugiem.lv voi facebook.

Kai vyspuor viertej paguojušū godu Latgolys muzykā?

Juoatzeist, ka kūpumā latgalīšu muzyka nav augstā leiminī. Prūtams, kai jau iz jebkuru lītu, ari iz muzyku var vērtīs nu dažaidim aspektim i beiguos pīruodeit, ka bolts ir malns… Bet maņ pateik saukt lītys eistajūs vuordūs – latgalīšu grupu jau tai nav daudzi, turkluot ir tikai vīna voi divejis, kas pa eistam tur leidza vydusmāra Eiropys grupom i tai saucamajom Latvejis pyrmuo ešalona grupom. Nui, mes asam roduši byut lapni par sovu latgaliskumu, raugam vysu dareit patīsi i emocionali, bet juoatzeist, ka pītryukst prasmu i kvalitatis. Myusim vysim ir vēļ daudz juostruodoj. Juoizkūp instrumentu spēle, aranžiejumi, dzīduošonys manīre. Nu ūtrys pusis – secynoju, ka latgalīšu muzykanti ir pādejā laikā sasasparuojuši. Lela prīca par “Green Novice”, “Bez PVN”, “Rikšu”, Laurys Bicānis albumim. Ar napacīteibu gaidu koč kū jaunu nu grupys “Krampis”, kas piec munu dūmu ir da gola nanūviertēta. Kūpumā secynoju – kaida Latgola – taida i muzyka – atsateista!

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]