Daugovpiļs teatrī gaidoma pyrmizruode “Savējie”

LaKuGa 23. Marts, 2014. gods Comments Off on Daugovpiļs teatrī gaidoma pyrmizruode “Savējie”
Daugovpiļs teatrī gaidoma pyrmizruode “Savējie”

29. martā Daugovpiļs teatrī pyrmizruodi pīdzeivuos Kristīnis Jokstis komedeja Harija Petrocka režijā “Savējie”. Tys byus stuosts par sābru attīceibom, par dažaidom saimem i spieju sadzeivuot. 

Daugovpiļs teatra apmaklātuojim vēļ spylgtā atmiņā ir palics īstudiejums “Klepernīku pogosta zvaigzne”. Bet niu, piec napylnu četru godu, lugys autore Kristīne Jokste i režisors Harijs Petrockis ir sasatykuši vēļreiz, lai radeitu īstudiejumu “Savējie”. Izruodis režisors Harijs Petrockis stuosta: “Jaunīstudiejumu vys navarātu saukt par “Klepernīku pogosta zvaigzne – 2”, bet nalelys paralelis var viļkt. Izruode tūp kai stuosts par myusu leidzcylvākim, par Latvejis etniskuo sastuova dažaideibu i tū, kai mes vysi kūpā te dzeivojam, partū ka vysi jau asam “zam vīna jumta.””

Juoatzeimoj, ka ar īstudiejumu “Savējie” režisors Harijs Petrockis sviņ sovu 50 godu jubileju. Daugovpiļs teatrī režisors struodoj nu 1991. goda i itymā laikā ir satics ari sovu sīvu Inesi Laizāni. Partū na veļti Inese kai aktrise pīsadola Harija Petrocka jaunīstudiejumā.

Izruodis rodūšuo komanda aicynoj apmeklēt izruodi dažaidu tauteibu i vacuma skateituojus, partū ka tys byus stuosts par mums, kai uzsver režisors – „Īstudiejums byus gaišs, pozitivs, muzykals, ar humoru i dūmuots atpyutai.”

Ziņa sagataveita piec Daugovpiļs teatra informacejis.
Karteņa: publicitatis karteņa

Komentari slāgti.