Aicynoj pīsadaleit festivalā “Muzykys skrytuļs”

LaKuGa 28. Marts, 2014. gods Comments Off on Aicynoj pīsadaleit festivalā “Muzykys skrytuļs”
Aicynoj pīsadaleit festivalā “Muzykys skrytuļs”

Jaunuos latgalīšu muzykys festivala “Muzykys Skrytuļs‟ organizatori aicynoj muzykantus i grupys pīsaceit sovu daleibu koncertūs.

Daugovpiļs nūvoda Leiksnā ituo gods 4., 5. i 6. julī jau pīktū reizi nūtiks leluokais jaunuos latgalīšu muzykys festivals “Muzykys Skrytuļs‟, puļcejūt muzykantus, kuri vysaidūs žanrūs roksta ci izpylda dzīsmes latgaliski.

Festivala laikā nūtiks četri koncerti: etno muzykys koncerts, akustiskais i rokgrupu koncerti, kai ari goreiguos muzykys koncerts. Pyrmū reizi festivala ītvorā teik reikuots goreiguos muzykys koncerts, kas nūtiks svātdiņ, 6. julī Leiksnys Vyssvātuos Jezus Sirds Ruomys katuoļu bazneicā. Pyrmū reizi festivala “Muzykys Skrytuļs” organizatori reikoj ari etno muzykys koncertu, kas byus 4. juļa vokorā, kurā pīsadola aicynuotī dalinīki nu vysaidim Latvejis regionim. Dalinīki uzastuos koncertā ar dzīsmem sovys pusis volūdā. Festivala 5. juļa koncertūs aicynuoti pīsadaleit solisti i muzykantu grupys akustiskajā koncertā (sastuovā da desmit cylvāku), muzykantu grupys (da septiņu cilvāku) – nakts koncertā i gosti nu aizrūbeža.

Festivalā “Muzykys Skrytuļs” teik saukti pīsadaleit na tikai muzykanti. Lai paplašynuotu festivala programu, radeitu muzykys i muokslys sinergiju, teik reikuots pleners “Muokslys Skrytuļs”, kura ītvorā nu organizatoru saguoduotajim materialim, muokslinīki roda breivdobys muokslys objektu.

Kotra sabīdriska organizaceja var pīsadaleit festivalā, organizejūt aktivitatis, kuruos teik paruodeita organizacejis darbeiba. Festivalā teik aicynuoti ari amatnīki i tierguotuoji, dūdūt vareibu īsaguoduot festivala gostim sovu produkceji. Sovu īguļdejumu var dūt sevkurs interesents, kurais gryb byut kai breivpruoteigais organizatoru paleigs.

Festivals ir nakomercials, tuo sanais moto “Kruot var na tikai naudu” ir spākā ari 2014. godā. Juoatguodynoj, ka jaunuos latgalīšu muzykys festivala “Muzykys Skrytuļs‟ reikuošona tyka suokta 2005.godā, atkuortuotai tys nūtyka ari 2006., 2007. i 2011. godā, popularizejūt latgaliskū identitati i veicynojūt jaunu dzīšmu radeišonu latgaliski.

Festivala nūlykumu, nūtikšonu programu i pīsacejuma anketys var atrast ite.

Festivala jaunumim sekojit ari socialajūs teiklūs: draugiem.lv, facebook i twitter, kai ari sātys lopā liksna.lv

Festivalu reikoj Daugovpiļs nūvoda Kulturys puorvaļde i Leiksnys pogosta puorvaļde.

Ziņa sagataveita piec festivala organizatoru dūtuos informacejis.

Komentari slāgti.