Leivuonā izsludynoj skiču konkursu jaunai piļsātys rūbežzeimei

Leivuonā izsludynoj skiču konkursu jaunai piļsātys rūbežzeimei

Leivuona nūvoda dūme aicynoj muokslinīkus nu vysys Latvejis pīduovuot sovys idejis skiču konkursam originala lelformata vidis objekta – myusdīneigys piļsātys rūbežzeimis “Līvāni” – izveidei, kū planavuots izvītuot trejuos vītuos, ībraucūt piļsātā nu vysaidom pusem.

Lai radeitu interesi muokslinīkim, dizainerim, arhitektim, kai ari ituos jūmys studentim, Leivuona nūvoda dūme lobuokuos skicis autoram sūlej bolvu 500 EUR apmārā (piec nūdūkļu nūmoksys), kai ari tīseibys turpynuot dorbu pi objekta, izstruodojūt tehniskū projektu, par tū slādzūt atsevišku leigumu.

Leivuons ir piļsāta, kuru vysā garumā škārsoj vaļsts nūzeimis automagistrale A6, pa kuru kotru dīnu puorsavītoj vairuokys tyukstūšys autobraucieju, partū rūbežzeime ir nūzeimeigs vidis objekts, kas nanūlīdzami pīsaista cylvāku viereibu.

Rūbežzeimei ar uzrokstu “Līvāni” juobyut vysmoz 4 metrus augstai, dīnnakts tymsajā laikā izgaismuotai. Svaireigi, lai objekts paruodeitu Leivuonu kai piļsātu ar senejom stykla ražuošonys tradicejom, reizē akcentejūt piļsātys moto: “Leivuons – atslāgs Latgolys vuortūs!”

Muokslinīki nu vysys Latvejis sovus skiču projektus aicynuoti īsnēgt divejus mienešus – leidz 2014. goda 30. majam Leivuona nūvoda dūmē, Reigys ūļneicā 77, Leivuonā, LV-5316 ar nūruodi “Pilsētas robežzīmes “Līvāni” ideju skiču konkursam”.

Ar konkursa nūlykumu i praseibom var īsapazeit ite voi Leivuona nūvoda dūmis Byuvnīceibys i infrastrukturys daļā (t. 29410391, 65307270; e-posts: intis.svirskis@livani.lv).

Itūšaļt asūšuos piļsātys rūbežzeimis nav veiduotys vīnuotā stilā i ir nūvacuojušys – vacuokuo, veiduota nu sorkonu ceglu, pastateita pyrms vaira kai 30 godu i ir cīši nalobā tehniskā i vizualā kvalitatē. Divejis puorejuos veiduotys šamota tehnikā pyrms apmāram 15 godu.

Ziņa sagataveita piec Leivuona nūvoda dūmis dūtuos informacejis

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]