Iveta Apkalna Latgolys viestnīceibā GORS īskandynoj jaunuos varganis

Iveta Apkalna Latgolys viestnīceibā GORS īskandynoj jaunuos varganis

Vakar, 15. aprelī, Latgolys viestnīceibys GORS Lelajā zalā, spielejūt izcylajai varganistei Ivetai Apkalnai i kluotyn asūt Latvejis Republikys premjerministrei Laimdotai Straujumai, nūtyka jaunūs digitalūs vargaņu “Johannus Ecclesia” svineigais īskandynuošonys koncerts. Pasauļa leimeņa koncertzals niu tykuse pi pasauļa leimeņa instrumenta – itaids secynuojums vokora gaitā izskanēja vairuokkuort. Digitaluos varganis Rēzeknē niu ir, pasasokūt I. Apkalnys degsmei, uzjāmuma “Latvijas Valsts meži”, Vaļsts Kulturkapitala fonda i Rēzeknis piļsātys dūmis atbolstam.

15. apreļa vokorā Latgolys viestnīceiba GORS, Rēzekne, Latgola i Latveja dabuoja jaunu duorgumu, kas regiona i vaļsts koncertdzeivi paceļ jaunā leimenī. Spielejūt virtuozajai varganistei Ivetai Apkalnai, pīsadolūt Vaļsts kamerorkestram “Sinfonietta Rīga” i dirigentam Normundam Šnē, Juoņa Ivanova Rēzeknis muzykys vysškolys jauktajam koram i dirigentei Andai Lipskai, Rēzeknē tyka īskandynuotys jaunuos digitaluos varganis “Johannus Ecclesia”. Īskandynuošonys koncertu vadeja muzykys žurnalists Orests Silabriedis i Latgolys viestnīceibys GORS vadeituoja Diāna Zirniņa.

Rēzeknē asūšajim i Latvejis Radejis 3 programys “Klasika” klauseituojim beja īspieja pīdzeivuot varganistis I. Apkalnys sagataveitū programu, kurā juos aizdavums beja paruodeit piec īspiejis plašuoku jaunūs vargaņu īspieju kluostu. J.S. Baha, F. Lista, Dž. Talbena-Bola, T. Eskeša skaņdorbi, latvīšu komponista A. Kalēja tokāta par korāli “Gods lai ir Dievam augstībā”, koncerta kulminacejā Fr. Pulenka “Koncerts ērģelēm, stīgu instrumentiem un timpāniem” izskanēja varganistis virtuozajā spēlē pusūtrys stuņdis garajā programā.

Jaunuos varganis juridiski pīdar Juoņa Ivanova Rēzeknis muzykys vydsškolai, kas nūzeimoj, ka tuos vuiceibu, koncertu pīredzis i meistareibys veiduošonys vajadzeibom izmontuos tūpūšī varganisti. Kai atzeimuoja Iveta Apkalna, jai ruodīs, ka, golvonais, lai varganem ir pīpiļdeits, aktivs myužs, partū ka leidz ar tū pasavērs leluokys vargaņu muzykys atskaņuošonys īspiejis, i piļsātai byus īspieja eistynuot leluokus vargaņu muzykys projektus, pīmāram, sareikuot Starptautisku Vargaņu muzykys festivalu. Juoņa Ivanova Rēzeknis muzykys vydsškolys direktore Sandra Mežore atzyna, ka ir lela prīca par ituo daudzu īsaisteitūs pušu sadarbeibys projekta eistynuošonu, i kai muzykys školys direktorei „patīsa prīca, ka ir taidi audziekni, taidi cylvāki, kuri aizīt pasaulī, bet atsagrīž ar bezgola skaistu i vierteigu sapynu pīpiļdejumu”.

Ziņa sagataveita piec Latgolys viestnīceibys GORS dūtuos informacejis
Karteņa: Māris Justs

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]