Jaunumi Tiļžys bibliotekā

Jaunumi Tiļžys bibliotekā

24. apreļs Tiļžys pogosta bibliotekai beja zeimeiga dīna, partū ka nu papeira formularim puorguojom iz laseituoju elektroniskū apkolpuošonu. Itei dīna īīs viesturē kai jauns paviersīņs myusu bibliotekys dzeivē.

Lai suoktu itū apkolpuošonu, beja juoizdora nazcik prīkšdorbu. Paprīšku beja juosakuortoj vyss gruomotu fonds. Tys zeimoj, ka kotra gruomota tyka izcalta nu plaukta, ryupeigai apsavārta i izviertāta, voi tiks lykta elektroniskajā katalogā aba tyvuokajā laikā juonūroksta. Tod beja juoroksta elektroniskajā katalogā īlīkamūs gruomotu saroksti ar seiku kotrys gruomotys aprokstu. Sarokstus syutejom iz Bolvu Centralū biblioteku metodikei Anitai, kura vysys gruomotys īvadeja elektroniskajā katalogā i mums atsyuteja kotrai gruomotai pīškiertū sveitru kodu. Tod vēļreiz jēmem gruomotys uorā nu plaukta i leimiejom tymuos sveitru kodus. Itys process saucas „rekatalogizaceja”. Kūpā tyka rekatalogizātys 2300 gruomotys. Niu bibliotekys fondā ir 5406 gruomotys. Itūs sagataveišonuos dorbus darejom divatā ar ūtru bibliotekari Olgu. Tys praseja apmāram pusgodu aktiva dorba.

Struoduot ar biblioteku informacejis sistemu „Alise” vuicejuos kursūs Reigā. Bet praktiskys konsultacejis daudz deve Bolvu Centraluos bibliotekys darbinīki.

Lai varātu pylnvierteigi apkolpuot skaiteituojus, sistemā tyka savadeiti ari žurnali. Itū dorbu darejom pošys – gon vadeišonu sistemā, gon sveitu kodu drukuošonu i leimiešonu iz žurnalim. Kūpā tyka apstruoduoti apmāram 500 presis izdavumi.

Maņ ir prīca par tū, ka myusu pogosta biblioteka ir palykuse myusdīneiguoka, īt leidza tehnologeju atteisteibai.

Kai bibliotekare varu saceit, ka puoreja iz skaiteituoju elektroniskū apkolpuošonu nūteikti atvīgluos kasdīnys dorbu, partū ka programā ir vairuokys funkcejis, pīmāram, automatiska statistikys uzskaite. Apmeklātuojim tei byus parūceiguoka, uotruoka gruomotu īdūšona, kai ari parūceiga vajadzeiguo izdavuma pasyuteišona, rezerviešona i pagarynuošona.

Ceru, ka skaiteituoji nūviertēs bibliotekys pīduovuotūs pakolpuojumus i tūs aktivi izmontuos i gasteis pi mums.

Ziņu sagataveja: Tiļžys bibliotekys vadeituoja Ilze Pugača

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]