Latvejis Radejis kors aicynoj iz koncertuzvadumu “Rakstītāja”

Portals lakuga.lv 23. Majs, 2014. gods Comments Off on Latvejis Radejis kors aicynoj iz koncertuzvadumu “Rakstītāja”

rakstitajaLatvejis Radejis kors dirigenta Sigvarda Kļavys vadeibā sadarbeibā ar komponistim Mārtiņu Braunu, Imantu Kalniņu, Jāni Lūsēnu i Valtu Pūci ir apzynuojuši Bronislavys Martuževys literarū montuojumu, kuo rezultatā tūp koncertuzvadums “Rakstītāja”. Ituo nūtykuma režisors ir Roberts Rubīns, pīsadola instrumentaluo grupa i solisti – Ieva Kerēvica i Daumants Kalniņš. Pyrmizruode nūtiks 28. majā Lubuonys piļsātys klubā, dīnu vāluok koncertuzvadums tiks ruodeits Latgolys viestnīceibā GORS, bet Reigā iz muzykys nomu “Daile” klauseituoji teik aicynuoti 30. maja vokorā.

Muzykalais stuosts vess pa Bronislavys Martuževys (08.04.1924.-13.02.2012.) dzeivis stygom, atkluojūt vysaidys dzejneicys boguotuo myuža epizodis, juos puordzeivuojumus, sapynus i ilgys. Bronislava Martuževa aizguoja myužeibā 2012. goda februarī, atstuojūt deveņus dzejūļu kruojumus, kurūs izjustā, vīnkuoršā volūdā i ar vyssvātuokū mīlesteibu runuojuse par sovu dzimtini i Latvejis viesturis nūtikšonom. Bronislava beja laikmata legenda i Treju Zvaigžņu ordiņa virsneica. Kai Nacionaluos Pretuošonuos kusteibys dalineica i atbaļsteituoja izcītuse sūdu nūmetnēs Sibirī. Jei beja ari izcila folklorys teicieja ar skaistu bolsu, muzykali apduovuota, spielējuse cītaru i akordeonu, kai ari sacerējuse Atmūdys laika pazeistamū dzīsmi “Jaunība, jaunība, sārtais vīna trauks’’.

Koncertuzvadumā pīsadola: Ieva Kerēvica, bolss; Gundega Krūmiņa, bolss; Daumants Kalniņš, bolss, oboja; Jānis Strazdiņš, bass; Indulis Cintiņš, vijūle; Aldis Liepiņš, klavīris; Ivo Krūskops, sytaminstrumenti; Artūrs Noviks, akordeons; Mareks Auziņš, kontrabass; Roberts Rubīns, režisors; Latvejis Radejis kors; Sigvards Kļava, dirigents. Programā: Jāņa Lūsēna, Mārtiņa Brauna, Valta Pūcis, Imanta Kalniņa dzīsmis ar Bronislavys Martuževys dzeju.

Koncertu organizej VSIA “Latvijas Koncerti”. Beleti pīejami “Biļešu paradīzes” kasēs i škārsteiklā www.bilesuparadize.lv, kai ari koncerta nūrisis vītā.

Komentari slāgti.