Nūtykuse Latgolys bārnu i jaunīšu folklorys nūmetne

Nūtykuse Latgolys bārnu i jaunīšu folklorys nūmetne

Nu 18. leidz 21. juņam Leivuona 1. vydsškolys Laimenis suokumškolā nūtyka Latgolys bārnu i jaunīšu folklorys nūmetne “Garā pupa”, kurā pīsadaleja bārni i jaunīši nu Leivuona, Jaunsylovys, Rudzātim, Preilim, Vuorkovys, Seiļukolna, Kruoslovys, Izvolta, Vabalis i Jākubpiļs.

Folklorys nūmetne “Garā pupa”, kura bija sareikuota ar Vaļsts Kulturkapitala fonda, Leivuona nūvoda dūmis, Leivuona 1. vydsškolys i Leivuona BJC atbolstu, pulcynuoja bārnus i jaunīšus jau vīnpadsmytū godu piec kuortys.

Nūdarbeibu saturs i formys tyka izvālātys atbylstūši bārnu i jaunīšu  vacumam- caur dzīsmi, rūtaļu, caur spēlem, sarunom i praktisku dorbuošonūs senejūs omotu meistardarbneicuos. Folklorys nūmetnis programa beja īplānuota tai, lai bārni varātu cyts cytu lobuok īpazeit, sasadraudzēt i taidā lobdabeigā gaisūtnē tikt pi kūpdarbeibys pīredzis ar školuotuojim i vītejuo regiona teiciejim i muykantim. Kasdīnys nūdarbeibu saturs beja veļteits padzilinuotai folklorys apgivei zynūšu i talanteigu školuotuoju vadeibā. Dorbojūtīs Latgolys bārnu i jaunīšu folklorys nūmetnē “Garā pupa” , omotnīku vadeibā bārnim beja vareiba īsavuiceit īmanis ausšonā, keramikā, jūstu i capuru  peišonā, lupotu pakluoju tamburiešonā i cytūs rūkdorbūs. Tautys muokslys studejis “Dubna” vadeituoja Inese Valaine īruodeja ausšonu. Ar prīcu bārni īsasaisteja “Čaklūs rūku puļceņā”, kū vadeja Helēna Ērgle, Evita Kleina i Renāte Andiņa. Ar aizrauteibu bārni dorbuojās keramikys nūdarbeibuos Eleonorys Pastaris vadeibā. Pi rūkdarbneicys Žannys Vilcānis varēja vuiceitīs peit jūstys, tamburēt lupotu pakluojus voi darynuot capuris. Breineigi darbeni topa rodūšajā darbneicā “Garās pupas raibie raksti”, kuru vadeja školuotuoja Kristīne Lude. Eists pīdzeivuojums beja sasatikšona ar zemissorgu Rihardu Utinānu.

Nūmetnis laikā sevkuram beja vareiba īsavuceit kaida latvīšu tautys muzykys instrumenta – kūklis, garmanis, stabulis, dūdu spēlis prasmi. Kūklis spēli varieja īsavuiceit ar folklorys kūpys “Raksti” vadeituojis Vitys Tallys paleidzeibu. Školuotuoja Dace Prūse nūmetnis dalinīkim vuiceja leigūtnis i Juoņu rūtalis. Leli paleigi beja folklorys kūpys “Ceiruleits” dalinīki. Agnese Kārkle vadeja vijūļspēlis nūdarbeibys, Oskars Bērziņš – stabulis spēlis nūdarbeibys, Mairis Iesalnieks – vuiceja muzicēt ar akordeonu i garmani, kai ari paleidzēja īsavuiceit dūdu spēlis pamatus. Daņču vokorā tyka izdoncuots vasals ducs daņču. Poši mozuokī bārni aizrauteigi dorbuojuos “Lelajā rūtaļnīkā”,  kū vadeja školuotuoja Helēna Ērgle.

Gastejūt Azaru sātā, tyka izzynuotys  pierts gudreibys Zaļuos aptekys nūslāpumi zuoļu sīvys i piertneicys Kristīnis Šišlovys vadeibā. Sevkuram beja vareiba izapērt lauku piertī i baudeit mauduošonūs pi pierts asūšajā Sylovu azarā. Lels paļdis vysai Rubeņu saimei par breineigū dīnu, vīsmīleibu, sirsneibu i ilgstūšū sadarbeibu!

Paļdis vysim, kuri guoduoja lai nūmetne izadūtu! Lai dzīsme par Garū pupu skaņ vysu godu leidz pat nuokamajai vosorai!

Print Friendly, PDF & Email

Kalenders

Mar
28
Cat
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]
Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]