Rēzeknē nūtiks konfereņce “Muoksla i muzyka kulturys diskursā”

LaKuGa 4. Septembris, 2014. gods 1

19., 20. i 21. septembrī Rēzeknis Augstškola (RA) sadarbeibā ar Tallinys Universitati (Igauneja), P.M. Mašerova vuordā nūsauktū Vitebskys Vaļsts universitati (Boltkrīveja) i Moskovys Piļsātys Pedagogiskū universitati (Krīveja) reikoj III storptautiskū zynuotniski praktiskū konfereņci “Muoksla i muzyka kulturys diskursā”. Jemūt vārā īprīkšejūs godu pīredzi, var drūši saceit, ka konfereņce ir sajāmuse cīši lelu sabīdriskū rezonansi, tamā ir pīsadalejuši vaira nakai 250 dalinīku, zynuotnīku i praktiku na tik nu Latvejis, bet ari nu Lītovys, Igaunejis, Grīkejis, Norvegejis, Lelbritanejis, Boltkrīvejis, Krīvejis.

Konfereņce ari itūgod pīduovuos apjūmeigu i saistūšu zynuotniski praktiskū i izgleitojūšū daļu ar tuoluokizgleiteibys īvirzi vysaidu leimeņu muokslys i muzykys nūzaru Latvejis, nu vysupyrma – Rēzeknis nūvoda pedagogim. Kai jau īrosts, kotru godu organizatori īvīš jaunynuojumus, i ituo goda inovaceja ir ituos konfereņcis Muokslys kataloga izdūšona. Ir īsnāgti 14 muokslinīku dorbi nu Latvejis, Krīvejis i Lītovys.

Konfereņcis mierkis ir atteisteit storptautiskū sadarbeibu storp zynuotnīkim i zynuotnis institucejom, veicynojūt storpdisciplinarū pietnīceibu i praktiskuos pīredzis apmaiņu muokslā i muzykā.

Konfereņcis temys: Kultura i sabīdreiba regionaluos identitatis diskursā, Muzykys zynuotne praksei, Muoksla i dizains, kai ari teik pīduovuota daleiba meistardarbneicuos, kuruos byus vareiba vuiceitīs profesionalū muzyku, kora dzīduošonu, tautys muziciešonu i dejis, tekstilmuokslu, gleznīceibu i grafiku, dizaina sovpateibys. Konfereņcis dalinīki sovus dorbus  prezentēs latvīšu, angļu voi krīvu volūdā.

Meistardarbneicu dalinīkim juojem vārā, ka leidz 2014. goda 15. septembram ir juosamoksoj daleiba meistardarbneicuos tim, kuri nav konfereņcis dalinīki (EUR 7.00 par daleibu 1 meistardarbneicā). Ar dorba materialu i apreikuojumu, individuali sasazynojūt ar konfereņcis organizietuojim, nūdrūšynoj meitardarbneicu vadeituoji.

Dalinīkim ari ir vareiba pīsadaleit nakts ekskursejā Latgolys sirdī – Rēzeknis piļsātā – i konfereņcis nūslāguma dīnā apmeklēt Ondrupinis lauku sātu.

Konfereņcē aicynuoti pīsadaleit zynuotnīki, praktiki, pedagogi, amatīrmuokslys kolektivu vadeituoji i tūs dalinīki, klauseituoji i dalinīki meistardarbneicuos.

Konfereņcis plenarsēdi varēs redzēt ari tīšraidē 19. septembrī 10.00 Rēzeknis Augstškolys sātys lopā www.ru.lv

Komentari slāgti.