Leidz 14. oktobram Turisma centrā “Bāka” apsaverama muokslineicys Agrys Ritinis gleznu izstuode “Pļova”.

Moza bārna pasauļa leluma izjiuta bīži īsasuoc ar īīšonu pļovā. Pieški tu īraugi miļjonim reižu atsakuortojūt zuolis stībrus, tovā augumā zīd kruosainys i reibynūši smuordeigys pučis. Ka apsagulsti pļovā, Dabasi ir LELI! I ruopoj skudrys, mozi napazeistami kukaini, iz uodys palīk zuolis nūspīdumi, nu dvēselē skaistuma nūspīdumi…

Paguojušuo goda vosorys laiks gleznuotuojai Agrai Ritiņai brīdynuoja ilgys gleznuot sajiutys par Pļovu, partū ka PĻOVA  ir skaista, sentimentala, zīdūša i jau puorzīdiejuse!
Maineiga!
Klusa i skaņa – kukaiņu saniešona, spuornu šveikstiešona, smylgu skoru sasaskaršona, sylta gaisa vyrmuošona!
Kruosaina – pīniņu kluojs, peipiņu pļova, duobula klajums, paguojušuo goda sakrytušuos lopys, sylts zuolis zaļums!
Saulaina voi leitā mozgojās!

Gleznys, kas aizvylynoj sajiutuos, kotram cytaiduos, personeiguos, vuordūs naizsokamuos. Aizvylynoj sagaideit sovu vosoru i vaicuot sovu pļovu.

Agra Ritiņa konsekventi sagloboj sovu gleznīceibys meistareibu i izkūptū kompozicejis skaidreibu. Gleznu kompoziceju monumentalitate styngrai saisteita ar cīši sīviškeigu pīeju detaļuos. Tīkšonuos piec piļneibys, lai cik lels ci mozs byutu formats.

Gleznīceibu vuicejusēs Latvejis Muokslys akademejis Latgolys filialē pi pedagoga gleznuotuoja A. Zelča i Latvejis Muokslys akademejā magistra studejuos pi profesoru K. Zariņa i A. Naumova. Itūšaļt struodoj Rēzeknis Muokslys i dizaina vydsškolā par gleznuošonys i rūkdorbu pasnīdzieju. 2004. godā beja galerejis “Laipa” Valmīrā izstuodis “Ainova” laureate, tys deve vareibu dūtīs rodūšajā braucīnī iz Valmīrys sadraudzeibys piļsātu Hoje – Tāstrupu (Dānejā). Agra Ritiņa namaineigi ir daudzu izstuožu dalineica, jei sareikuojuse personalizstuodis Ludzā, Rēzeknē, Reigā, Valmīrā, Preiļūs, Leivuonā, Bolvūs.