Ontona i Annes Tematiskais parks Baļtinovā

Ontona i Annes Tematiskais parks Baļtinovā

Rudiņa sorkonūs lopu pakluojs, kas vīglai puorsakluoj puori Baļtinovys īlom, ir steidzeiguo laika viestness. Ruodīs, ka vēļ vakar gaisā vyrmuoja svaigi pļautuo sīna smuords, kod tū jau nūmainejs drāgnais rudiņa viejs. Laiks apsastuoj i atsavērt iz raibajim dorbim, kas nūtykuši Baļtinovys nūvodā.

Itūgod bīdreiba “Jaunīši Baļtinovai” suokuse seņ izlūluotuos idejis realizaceju par Ontona i Annes tematiskuo parka izveidi. “Ontons i Anne” ir tautā zynoma teatra izruode, kas Baļtinovys vuordu nasuse vysā Latvejā. Lelu prīcu i gondarejumu saguodoj fakts, ka Latvejis Nacionaluo teatra izruodis “Latgola.lv” i “Latgola.lv – 2” ir veiduotys, bolstūtīs iz myusu pošu izruodis “Ontons i Anne” pamata. Kūpejuos projekta izmoksys sastuoda 7065,15 EUR, nu kurom 89% teik atbaļsteiti Borisa i Inārys Teterevu fondam. Projekta realizaceja suokta ituo gods 1. julī i ilgs da 2015. goda 30. juņam. Ituo goda ītvorūs plānuots puorbyuvēt tyltu, kas vad iz Vacuo parka teritoreju, izveiduot bruģa celeņus, izgatavēt sūlus, informativuos nūruodis, leigačys i foto rāmi dobā, izveiduot Ontona i Annes siluetus i izbyuvēt lapeni.

Nu projekta suokuma ir paguojuši jau treis mieneši. Ir padareits daudz, kas prīcynoj ari pošus bīdreibys “Jaunīši Baļtinovai” puorstuovus. Treis mienešu laikā ir nūjaukts vacais kūka tylts, kas aizstuots ar jaunu metala tyltu. Kai atzeist poši jaunīši, tod vysvīgluokais pūsms bejs tyltu nūjaukt, nu vysleluokais izaicynuojums suocīs, kod bejs juosuoc veiduot jaunu karkasu metala tyltam. Bīdreibai lelu atbolstu devs Aigars Keišs, kas i devs padūmus, īguļdejs sovu laiku i dorbu tylta matynuošonys dorbūs. Tylts tyka veiduots piec Beātis Graudumnīcis veiduotuos skicis. Juļa beiguos jaunais tylts tyka pastateits.

DSC_03810

Nuokamais lelais aizdavums beja izveiduot bruģa celeņus. Vīnojūtīs bīdreibys puorstuovim, tyka nūlamts, ka bruģa celeņu raudzēs imitēt kai pokovu, kas ir Baļtinovys nūvoda simbols. Diveju mienešu garumā parka teritorejā nūtyka aktiva rūseiba. Šaļtim rodūt sajiutu, ka atsarūņ lelā byuvlaukumā – vysapleik smiļšu kolni, izroktys tranšejis, dzierdama traktora ryukūņa, čalys i klaigys. Niu dorbi pi bruģa celeņa jau ir nūsaslāguši, nu vēļ atmiņuos uzakavēt par pīdzeivuotū bīdreibys puorstuovi gryb vys vēļ. Gondarejums i mīlesteiba, kas tyka īguļdeita kotrā paveiktajā seikumā ir naaprokstama.

DSC_0501

Soka, ka nu mozu lītu tūp leli dorbi. Bīdreibys “Jaunīši Baļtinovai” puorstuovi lobpruot pīsaturietu pi itim vuordim kai pi sova naoficialuo moto. Nu mozys idejis par Vacuo parka uzkūpšonys dorbim radeits grandiozs projekts par “Ontona i Annes” Tematiskuo parka izveidi. Golvonais ticēt sev, sovom idejom i vierzētīs iz mierki.

Miļzeigu paļdis “Jaunīši Baļtinovai” soka Borisa i Inārys Teterevu fondam par dūtū vareibu i finansialū atbolstu, kai ari paļdis zīduotuojim, kuri zīduoja papyldu leidzekļus projekta eistynuošonai:
– teatra grupys “Palādas” dalinīkim nu Baļtinovys;
– Madarai Nikāzei nu Skrundys
– Uzjāmumam SIA “Merkurita”
– “Ontona i Annes” izruožu apmaklātuojim, kuri īsaguoduoja bīdreibys sagataveitūs suvenirus.

??????????????????????

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]