Latgalīšu kulturys ziņu portals lakuga.lv

Daugovpiļs teatrī pyrmizruode “Īsa pamācība mīlēšanā”

Daugovpiļs teatrī pyrmizruode “Īsa pamācība mīlēšanā”

Daugovpiļs teatrī 23. oktobrī pyrmizruodi pīdzeivuos vierīneigs, spylgts i muzykals īstudiejums “Īsa pamācība mīlēšanā”. Rūdolfa Blaumaņa feļetons, kurs saraksteits paguojušuo godu symta suokumā i palics par pamatu vairuokom izruodem i kinai, jaunys kruosys dabuos Daugovpiļs teatrī. Jaunīstudiejums ar maestro Raimonda Paula muzyku, Arnolda Liniņa dramatiziejums, režisors – Oļegs Šapošņikovs, nu par izruodis vizualū nūformiejumu ryupejās muokslinīki Kristaps Skulte i Dāvids (Romāns Andrejevs).

Izruodis ītvorūs byus apsaverami 17 muzykalī prīšknasumi, izdzīduotys tikpat dzīsmis, par kuru izpiļdejumu ryupejās Daugovpiļs teatra vokaluo pedagoge i LNO soliste Ilona Bagele, kai ari īstudiejumā pīsadaleis popularuo grupa “Laimys Muzykanti” Artūra Uškāna vadeibā i Daugovpiļs Vīneibys pamatškolys bārnu vokalais ansamblis. Tū vysu papyldynuos Daugovpiļs teatra modernuo baleta trupys horeografejis uzvadumi. Īstudiejuma veiduošonā ir īsasaistejuši ari Latvejā zynomī muokslinīki Kristaps Skulte i Dāvids (Romāns Andrejevs). Scenografs Kristaps Skulte itūgod tyka nomynāts Krīvejis teatra bolvai “Zalta maska” kategorejā “Muokslinīka dorbs muzykalajā teatrī”, sovukuort Dāvids ir vaira nakai 20 kolekceju autors, kurs jau īprīkš ir veiduojs tārpus teatra izruodem i vysaidim sabīdriskim pasuokumim. Dāvids ir vairuokkuortiejs Latvejis i storptautiskūs mūdis konkursu uzvarātuojs.

Kai jau īprīkš tyka mynāts, jaunīstudiejums byus ari vizuali kruošņs – teik gataveiti vaira nakai 120 tārpi, kurus papyldynuos 800 vysaidys detalis, kūpumā izlītojūt 1000 metru vysaida veida audumu. Ari izruodis scenografeja sūlej puorsteigumus. Tei byus da šam vierīneiguokuo dekoraceja Daugovpiļs teatra viesturē.

Caur itū muzykalū ceļuojumu tiks stuosteits par mums svareigajom vierteibom, partū ka Rūdolfa Blaumaņa dorbā “Īsa pamācība mīlēšanā”, kai uzsver izruodis režisors, ir īkodāts latviskuos identitatis kūduls: “Izruodi caurstrāvuos mīlesteiba iz sovu zemi, sātu, cylvākim, dorbu i tradicejom.” Jaunīstudiejums byus muzykals i atraktivs, nu tymā pošā laikā nūpītni tiks vaicuotys atbiļdis iz vaicuojumu – kas ir ciļvieceiba i mīlesteiba, kas ir svareiguok – uorejais voi īkšejais.

Pyrmizruode – 23. oktobrī 18.30.
Tyvuokuos izruodis
– 26. oktobrī 17.00, 9. novembrī 17.00 i 21. novembrī 18.30.
Beleti – Daugovpiļs teatra kasē (654 26520) i škārsteiklā www.bilesuparadize.lv

Nūtikšonu kalendars

Nov
19
Pyr
20:00 Muzykys izlasis “Dvieselis steig... @ restoranā “Plaza” Daugovpilī
Muzykys izlasis “Dvieselis steig... @ restoranā “Plaza” Daugovpilī
Nov 19 @ 20:00 – 21:00
Muzykys izlasis “Dvieselis steigys” prezentaceja @ restoranā “Plaza” Daugovpilī | Daugavpils | Latvia
Gatavejūtīs Latvejis symtgadis svātkim, muzykaluo apvīneiba “Teksasys Latgalīši” i muzike Aija Nagle-Īzāka nu ASV īrakstejuši albumu “Dvieselis steigys”, kurymā apkūpuotys labi zynomys latgalīšu i latvīšu melodejis jaunā interpretacejā.Drukavuot
Nov
20
Ūtr
19:00 Muzykys izlasis “Dvieselis steig... @ “Kino māja"
Muzykys izlasis “Dvieselis steig... @ “Kino māja"
Nov 20 @ 19:00
Muzykys izlasis “Dvieselis steigys” prezentaceja @ “Kino māja" | Riga | Latvia
Gatavejūtīs Latvejis symtgadis svātkim, muzykaluo apvīneiba “Teksasys Latgalīši” i muzike Aija Nagle-Īzāka nu ASV īrakstejuši albumu “Dvieselis steigys”, kurymā apkūpuotys labi zynomys latgalīšu i latvīšu melodejis jaunā interpretacejā.Drukavuot