Baļtinovys Muzykys i muokslys školā nu 27. oktobra leidz 10. novembram byus apsaverama izstuode “Latgolys kruosys”.

Izstuodis ekspoziceju veidoj dorbi, kas radeiti Latgolā. Autori dzeivoj i struodoj Latgolā. Dorbūs atsaspīgeļoj kotra autora individualais rūkroksts i pasauļa redziejums. Skateituojim teik pīduovuots atīt i personeigi izjust kotrys gleznys eipašū nūskaņu. Varbyut taišni jius uzrunuos pavasara uobeļzīdu gaišais vīglums, kruosuos suleiguo i ekspresivuo Latgolys laičiņu zīdiešona voi rudiņa i zīmys nūskanis.

Latgola – tik skaista, daudzveideiga sovuos izpausmēs i īdvasmojūša!

Izstuodē pīsadola:
— Inga Onževa – Rēzeknis Muokslys i dizaina vydsškolys pedagoge,
— Manuš – Latvejis Muokslys Akademejis Latgolys filialis tekstilnūdalis vadeituoja,
— Viktorija Rustamova – Latvejis Muokslys Akademejis Latgolys filialis studente,
— Elga Paura – Rēzeknis Muokslys i dizaina vydsškolys i Latvejis Muokslys Akademejis Latgolys filialis pedagoge,
— Ilze Grīzāne – Leivuona Omotnīceibys centra vadeituoja,
— Agra Riteņa – Rēzeknis Muokslys i dizaina vydsškolys i Latvejis Muokslys Akademejis Latgolys filialis pedagoge,
— Kristīne Binduka – Rēzeknis Muokslys i dizaina vydsškolys apgierbu dizaina nūdalis vadeituoja i Bārnu muokslys školys vadeituoja,
— Vēsma Ušpele – breivmuokslineica (Rēzeknis nūvods),
— Edeite Maderneica – gleznuotuoja (Bolvu nūvods, Bierzpiļs),
— Elita Teilāne, Olga Reče – Bolvu Muokslys školys pedagogis.

Izstuodi varēs apsavērt dorba dīnuos 10.00 – 18.00, breivdīnuos 12.00-14.00 Tiļžys īlā 17.