Nūtykuse uzvaduma “Francis” pyrmizruode
30. oktobrī Latgolys viestnīceibā GORS nūtyka literari muzykaluo uzvaduma “Francis” izruode. Uzvadums tyka veļteits Fraņča Trasuna pīmiņai.
“Fraņci, Fraņci, uūū, Fraņci, Fraņci, sātā!” – tai literari muzykaluo uzvadumā “Francis” īsuokumā vēļ mozū Fraņci Trasunu sātā sauce juo muote Īva. Dūmojūt leidzeibuos par goreidznīka, sabīdryskuo darbinīka i vaļstsveira Fraņča Trasuna (1864 – 1926) 150. dzimšonys dīnys nūtykumu, Fraņci sātā var saukt sevkurs vaļsts dzeivuotuojs, kam nūzeimeiga Latvejis byušona. Koč i Trasuna personeiba nav viertiejama vīnnūzeimeigi, tok fakts par juo īguļdejumu taidys teritorialuos Latvejis, kaidu tū zynom šudiņ, izveidē ir nanūviertiejams.
Vysaidu viesturiskūs laiku i apstuokļu dieļ par daudzim nūzeimeigim Latvejis Latgolys dalis ļaužu vuordim zynom mozuok kai, īspiejams, par cytim puorejūs regionūs, kuri sovulaik davuši svareigu īguļdejumu vaļsts izveidis procesu veicynuošonā, partū varbyut Ingys Ābelis “Klūgu mūks”, TV un radejis raidejumi i sižeti ir kai Fraņča atsagrīsšona sātā – cylvāku apziņā. Ari literari muzykalais uzvadums “Francis” beja vēļ vīns taids atsagrīsšonys mieginuojums. Akterspēle, muzyka i smiļšu animaceja izvede saguojušūs skateituojus caur F. Trasuna myuža nūzeimeiguokajom nūtikšonom – bierneibu, Jelgovys i Pīterpiļs studeju godim, 1917. goda Rēzeknis kongresa laiku, izsliegšonu nu bazneicys i nuovi nailgi piec Leldiņu. Lapnums i pazemeiba, stratega i politika pruots i kaisleigys jiutys, gūdeigums, napīļaunūt kompromisus, spieja atsasaceit nu seve i tikt par sova laikmata goreigū līderi – tys vyss raksturoj itū izcylū personeibu.
Radzūt gola rezultatu, skateituoju reakceju i nūviertejūt īguļdeitū dorbu, izruodis veiduotuoji cer, ka itei vys nabeja vīneiguo uzvaduma “Francis” publiska izruodeišona, ļaunūt cerēt, ka Trasuna dzeivis puslopom izadūs pīdzeivuot vēļ kaidu puorškūrsteišonys reizi skateituoju prīškā.
Uzvadumu veiduoja: režisore Māra Zaļaiskalns, scenareja autore Anna Rancāne, muzykys konsultante Ilona Rupaine, tārpu i scenografejis autore Ināra Apele, skaņuotuojs Ints Salmiņš, gaismuotuojs Ervīns Šaicāns, kusteibu režisori Ilmārs i Inga Dreļi, smiļšu animaceju veiduotuoja Guna Zandere (Smiļšu kino), tymā pīsadaleja Rēzeknis Tautys teatra akteri, deju kūpys “Dziga” dalinīki, J. Ivanova Rēzeknis muzykys vydsškolys jauktais kors.
Uzvaduma reikuotuoji – Rēzeknis latgalīšu kulturys bīdreiba, tuo taiseišonu atbaļsteja Vaļsts Kulturkapitala fonda Latgolys programa, Rēzeknis piļsātys dūme i Latgolys viestnīceiba GORS.
Kartenis: Andrejs Vasjukevičs
