Dzīduotuojis Aijis Rimšys eisais, nu pīpiļdeitais myužs, spylgtuo personeiba, talants, naatkuortojamais bolss i dzīšmu teksti vys vēļ apžylbynoj i puorsteidz daudzus juos talanta cīneituojus i klauseituojus. Latgolys entuziastu grupa BIĻDIS itūšaļt struodoj pi kinys par Aiju veiduošonys. Kab īpazeitu. Kab atguodynuotu. Kab naaizmierstu.

Aija Rimša (1967-2005) – savdabeiguo bolss īpašneica, i dzili skumeiguo, i dzili prīceiguo Latgolys dzīduotuoja, bīži saukta par “Latgolys rūžeņu”, sovā eisajā myužā izdavuse 9 dzīšmu albumus. Jau paguojuši 9 godi nu dīnys, kod Aija ir “zem cytu dabasu”, nu juos bolsu dzieržom skaņūt radejā gondreiž kotru dīnu. Juos sacerātuos i izpiļdeituos dzīsmis (“Kaprīzā meitene”, “Kam tu raudi, māmulīte?”, “Dāvini man”, “Vēstules bez vārdiem”, “Dzelteno rožu pavasaris”) i latgalīšu tautysdzīsmis (“Jezups”,  “Es beju māmeņai”, “Jau mani vad”) teik dzīduotys, mīļuotys, līk just i leidzpuordzeivuot, suopēt i smīt, ļautīs i nasastingt, atvērt sirdi tam, kū tev duovoj kotra dīna, kotra šaļts. Skaņ naatkuortojamais Aijis bolss, sajiutama juos muzykys eipašuo energetika, tok reši kurs zyna kū vaira par dzīšmu izpiļdeituojis personeibu, tuos veiduošonūs i nažieleigū liktini, ni taisnū i ni vīglū ceļu iz dzeivis golvonū vierteibu i pīpiļdejumu – muzyku.

Aijis talants vēļ nav pīteikamai nūvārtāts. Aijis personeiba i eisais, nu spylgtais myužs ir dziļuokys izpietis vārts. Juos originaldzīsmis byutu atseviški pietejams materials. Dzīsmis kai poša Aija nu dzeivisprīceigajom, ļusteigajom, aicynūšajom leidz dzili izsuopātajom, smeļdzeigajom… Daudzu cylvāku atmiņuos jei dzeivoj i ir tepat, gondreiž kluotyn… Daudzi vaicoj – parkū liktiņs bejs tik nažieleigs? Kaids nūsapyuš… Kaids kotru dīnu atguodoj kūpā pavadeitū laiku… Kaidam rudiņa smuords, viejs plykūs kūku zorūs, atsalaidušys latakys, pļova reita agrumā atguodynoj par jū… I puori vysam ir aplīcynuojums, ka tai just var tik dziļš i dvēselē boguots cylvāks. Taida mierktīceiba, degsme tai mīļuot sovu dzymtū nūvodu, sev tyvūs i duorgūs dzeivis cylvākus (bārni, saime, draugi, dzeivis liktineigī cylvāki) var tik LELS cylvāks, LELA personeiba. I patīss. Patīss pret sevi.

Piec Aijis Rimšys aizīšonys myužeibā juos dzymtajā i dzeivis piļsātā Rēzeknē, pasasokūt Rēzeknis Dzīšmu svātku bīdreibys i Aijis menedžera Pītera Laizāna veikumam, 2011. g. tyka sareikuots juos atceris pasuokums, kas puļcēja pylnu zalu klauseituoju. Tys ir aplīcynuojums, ka Aijis muzyka dzeivoj ari piec juos. Taipat kai atminis. Taipat kai juos sūli Rēzeknis īluos, tī palykuši ari leidzcylvāku sirdīs.

Kab atguodynuotu i īpazeistynuotu leluoku auditoreju ar Aijis kai talanteigys personeibys dzeivi, ceļu nu pyrmuos dzīsmis leidz nanūdzīduotajai, dzīšmu radeišonys ceļu, juos dzeivē tyvu cylvāku atmiņom, Latgolys entuziastu grupa BIĻDIS nu Rēzeknis (Edgars Blinovs, Ineta Atpile-Jugane, Sergejs Čakāns, Artis Vītols, Vitālijs Dudarenoks) sadarbeibā ar Aijis mamu Mariju Tāraudi, Aijis menedžeri Pīteri Laizānu, īsaistūt Aijis dzeivē, muzykys jūmā nūzeimeigus cylvākus, radinīkus, laikabīdrus, muziķus, struodoj pi kinys par Aiju radeišonys. Satykti, uzklauseiti i īpazeiti daudzi Aijis dzeivē nūzeimeigi cylvāki. Atlics sasatikt ar daudzim, kab kūpā izveiduotu atmiņu stuostu par cylvāku, kurs bejs mums kluotyn. I ir. Kotram cytaiž ir…

Kinys veiduotuoji byus prīceigi par kotru, kurs gribēs daleitīs sovuos atmiņuos, puordūmuos par naatkuortojamū personeibu Aiju, kab stuosts, kurs teiks veiduots nu mozu atmiņu mozaikys gabaleņu, byutu piec īspiejis patīsuoks, dzeivuoks i Aijis personeibu, byuteibu atkluojūšuoks. Kinys veiduotuoji byus pateiceigi sevkuram, kurs atrass vareibu ari finansiali voi kai cytaiž atbaļsteit projektu.

Aija Rimša – dzymuse 1967.g. Rēzeknē. Vuicejusēs i beiguse Rēzeknis 1. vydsškolu. Muzyku vuicejusēs pošvuiceibys ceļā. Akordeonu īsavuicejuse spielēt 5 godu vacumā. Struoduojuse Makašānu vydsškolā par vuocu volūdys školuotuoju, REBIR, Ūzulmuižys pogostā par kluba vadeituoju. Aijai pīdzymuši 3 dāli. Aijis muzykalais montuojums ir 9 dzīšmu albumi. Pyrmū kaseti “Tev un vientulībai” izdavuse 1995.g., nu pādejū 2003.g. “Zem citām debesīm”. Dzīduotuoja myužeibā piec gryutys slimeibys aizguojuse 2005. g. 14. oktobrī, paglobuota Rēzeknis nūvoda Ūzulmuižys kopūs.

Ziņa sagataveita piec Latgolys entuziastu grupys “Biļdis” dūtuos informacejis

Karteņa: nu Aijis saimis arhiva