Orudi.lv svietej goda jubileju

Portals lakuga.lv 17. Decembris, 2014. gods Comments Off on Orudi.lv svietej goda jubileju

Gods tyvojās nūslāgumam i daguojs laiks atsavērt iz padareitū. E-katalogs orudi.lv novembrī svieteja sovu goda jubileju. Škārsteikla veikals radeits sasadorbojūt divejom bīdreibom – “Saulesvecei” nu Brīžucīma i “Sukrumam” nu Baļtinovys. Ideja rodusēs, pasasokūt vēļmei apvīnuot vīnkūpus vysus rodūšūs ļauds i veicynuot vareibu realizēt pošu rūkom veiduotūs izstruoduojumus. Gods aizritiejs vieja spuornim, nasdams e-katalogam i rūseigu, i na tik rūseigu dorba laiku.

Orudi.lv atsateista pamozom, nu ar mozim sūleišim īt iz lelu mierki. Aizvadeituo goda laikā e-katalogā apsavieršonai publicātys 574 precis, kurys var īsaguoduot sevkurā šaļtī, izpiļdeiti 14 pasyutejumi, sapuļceiti gonreiž 20 omotnīki, kas pīduovoj sovu produkceju apsavieršonai i īguodei. Omotnīki, kas pīduovoj sovu produkceju orudi.lv, ir i nu Baļtinovys nūvoda, i Bolvu nūvoda, i Kuorsovys nūvoda. Par vyspopularuokū preci aizvadeituo goda laikā ir palykušys pierļuošonys stuovi, kuru autors ir Ilgvars Keišs. Stuovi aizceļuojuši iz vysvysaidom Latvejis vītom.

Par lelu sasnāgumu atzeits teik tys, ka sātys lopu nu ituo goda suokuma īspiejams skaiteit na tik latvīšu volūdā, nu ari angļu volūdā, kas paver vareibys nūdybynuot kontaktus uorpus Latvejis rūbežu. Orudi.lv veiduotuoji cer, ka tai varēs uzrunuot interesentus uorpus Latvejis rūbežu spēs nest sovys dzymtuos vaļsts vuordu pasaulī ar viestejumu, ka mes varam i doram.

Vysi interesenti, kas gryb sekuot leidza orudi.lv aktivitatem, var tū dareit taidūs popularūs socialajūs teiklūs kai twiter.com i draugiem.lv. Itamuos škārsteikla vītnēs vysod teik īlykta jaunuokuo informaceja par aktualitatem, kai ari ziņuots par jaunu izstruoduojumu dalikšonu orudi.lv katalogam. Dreizumā sātys lopys jaunumu sadaļā byus īspiejams vāruot dokumentalūs sižetus par omotnīkim i jūs rodūšajom gaitom. Itei vareiba nūdrūšynuota pasasokūt projektam “Vuicomēs byut par sova omota meistarim”, kas finansiali teik atbaļsteits Sabīdreibys Integracejis fondam.

Komentari slāgti.