Rēzeknis Augstškolā nūtykuse konfereņce “Autors. Teksts. Laikmats”

LaKuGa 6. Majs, 2015. gods Comments Off on Rēzeknis Augstškolā nūtykuse konfereņce “Autors. Teksts. Laikmats”

23. i 24. aprelī Rēzeknis Augstškolā (RA) nūtyka 4. storptautyskuo zynuotniskuo konfereņce “Autors. Teksts. Laikmats.”, kas beja veļteita literaturzynuotneicys Ilonys Salcevičys 75 godu jubilejam.

salcevica FIKonfereņce, kurys idejis autore i koordinatore ir Dr. philol. Sandra Ratnīce, ir breineiga vareiba interesentim izzynuot par aizvadeituo goda nūtikšonom literaturā, diskutēt par aktualom literaturzynuotnis, filozofejis, kulturologejis problemom. Konfereņcis plenarsēde tyka veļteita I. Salcevičai. Sasatikšonys laikā literaturzynuotneica deve detalizātu informaceju par sovu dzeivis guojumu, analizejūt dzymtys kūku i ruodūt, cik daudz latgalīšu, latvīšu, nu pieckara periodā ari Eiropys kulturā ir bejs personeibu nu ituos kupluos dzymtys. I. Salceviča ir daudz padarejuse myusu dīnu latgalīšu rakstnīceibys apzynuošonā, pīsadalejuse taidu fundamentalu izdavumu sagataveišonā kai “Latviešu rakstniecība biogrāfijās”, “Latgaliešu kultūras darbinieki”, izdavuse zynuotniskū apceriejumu par J. Klīdzēju i latgalīšu prozys raksturuojumu. Kluotynasūšajim jei plašuok stuosteja sovys bierneibys atminis, kurys saistuos ar tāva – Jura Pabierža juniora – draugim Aleksandru Čaku i Juoni Sudrabkalnu. Juouzsver, ka I. Salceviča ir vīna nu pyrmajom pasnīdziejom Rēzeknis Augstškolā.

Konfereņcis laikā vairuokuos sekcejuos tyka diskutāts par 2014. goda latvīšu literaturu, jaunuokajim pietejumim literaturys viesturē i jaunuokū metodologeju teksta analizē, taipat tyka runuots par literaturu i nacionalajim kodim (mitologeja, folklora, etnografeja, latgalīšu teksti, Latvejis cytu tautu i cytu nūvodu literatura), literaturys i cytu muokslys veidu i zynuotņu nūzaru mejīdarbi. Tyka prezentāti ari Rēzeknis, Līpuojis i Pleskovys filologejis studentu jaunuokī pietejumi literaturzynuotnē.

Pyrmuos konfereņcis dīnys nūslāgumā interesenti i dalinīki tykuos ar dzejneicu Annu Rancāni, kura skaiteja sovus dzeivuļus i dalejuos atmiņuos par dramaturgu i ilggadieju školānu literaruos nūmetnis “Aicinājums” vadeituoju Daini Grīnvaldu. Piečuok varēja īsaklauseit fragmentā nu Andra Zeibota apceris par D. Grīnvaldu i jaunūs autoru nu Līpuojis (Undīne Arāja, Dace Metieja, Eriks Vilsons), Rēzeknis (Inga Kaļva, Anita Mileika, Oskars Orlovs) i Reigys (Anna Belkovska, Gints Dreimaņs, Ance Kristāla, Alise Redveņa, Andrejs Veiksna) dzejis i prozys prīškskaitejumūs. Piec tam kluotynasūšī tyka īsaisteiti Līpuojis teatra aktera E. Vilsona monoizruodē, kas beja izveiduota piec R. Blaumaņa novelis “Nezāle” motivu. Sovukuort piec ūtruos konfereņcis dīnys dalinīki devēs iz Roberta Mūka memorialuo muzeja atkluošonys pasuokumu piec tuo renovacejis Gaļānūs, Rībeņu nūvodā.

Nūsavērt konfereņcis atsevišku sekceju videoīrokstus īspiejams RA sātys lopā.

Komentari slāgti.