Apsaverama Latgolys Kulturys centra izdevnīceibai veļteita izstuode

LaKuGa 17. Juņs, 2015. gods Comments Off on Apsaverama Latgolys Kulturys centra izdevnīceibai veļteita izstuode

Da 30. juņam Latgolys Kulturviesturis muzejā Rēzeknē apsaveram Latgolys Kulturys centra izdevnīceibys 25 godu jubilejam veļteita izstuode. Tymā atspūguļuota izdevnīceibys darbeiba 25 pastuoviešonys godu laikā, i apsaverami vairuoki simti izdūtūs gruomotu.

1990. goda aprelī, ar mierki atjaunuot latgalīšu literaturys īzdūšonu i apzynuot cytys Latgolys kulturys vierteibys, Rēzeknē dybynuoje sabīdriskū organizaceju „Latgales Kultūras centrs”. Ar tuo poša goda 1. juni LKC izdevnīceibys vadeišonu uzajēme Juoņs Elksnis.

Da itam laikam izdūts gondreiž 500 dažaida satura izdavumu – gruomotys, brošurys, bukleti, kai ari divi regularī izdavumi – kulturviesturisko i literaruo godagruomota “Tāvu Zemes kalendars” i literarais almanahs “Olūts”.

Latgolys Kulturys centra izdevnīceibys 25 godu jubileja pasuokums nūtiks 19. junī 15:00 stuņdēs Rēzeknis Centraluos bibliotekys 3. stuova laseitovā (Rēzekne, Atbreivuošonys aleja 81.5).

Komentari slāgti.