Grupa “Dabasu Durovys” pīduovoj jaunu dzīsmi

LaKuGa 22. Juņs, 2015. gods Comments Off on Grupa “Dabasu Durovys” pīduovoj jaunu dzīsmi

Nav nūslāpums, ka trešdaļu dzeivis mes pavodam mīgā, par tū vārts aizadūmuot par vysdažaiduokajim stuostim, kurus radzam asūt mīgā. Bīži sapyni ruodīs tik reali, ka tūs nimoz navar atškiert nu eistineibys. Dažreiz asam prīceigi pasamūst i saprast, ka pīdzeivuotais ir tikai sapyns, nu cytreiz, lai cik sovaiž i skumjai nabyutu, gribim palikt sapynā, i gribim, lai nikod napasamūstu. Par itū temu grupa „Dabasu Durovys” pīduovuoj sovu jaunuokū veikumu – dzīsmi latvīšu literarajā volūdā „Šūpuļdziesma”.

Īroksts veikts „Custom Rd” studejā Daugovpilī, dzīsmi miksēja Armands Treilihs. Īrokstā pīsadaleja Romāns Sladzis (gitara), Arņs Slobožanins (gitara), Egils Kulmanis (bolss, taisteni), Valdis Rundzāns (basgitara), Aleksandrs Tamans (bungys).

Dzīsmis video klipa idejis autori ir Sandra Poplavska i Juoņs Rimicāns (studeja „3Karotes Medus”) i Arņs Slobožanins. Kab rostu napīcīšamū nūskaņu i akcantātu dzīsmis viestejumu, video filmāts laukūs (Daugovpiļs nūvoda Leiksnā) pylnmieness naktī. Ceiņu storp murgim i gaišajim sapynim ilustrēt paleidzēje Daugovpiļs Saulis školys aktiru kursa studenti, nu golvonajā lūmā īsajuta septeņgadeiguo Ulriha Platace.

Nu 23. juņa dzīsmi varēs klauseitīs Spotify, Deezer, i iTunes.

Komentari slāgti.