21. augustā 21.00 iz Latgolys viestnīceibys GORS jumta terasis nūtiks poetiskuo roka apvīneibys “Kapļi” albuma “Ašņa dasys” prezentacejis koncerts. Koncerta eipašī gosti – grupa “Inokentijs Mārpls”.

Jaunajā albumā “Ašņa dasys” byus 10 dzīšmu, nu kurūs dažys jau dzierdātys apvīneibys pyrmajā digitalajā mini albumā “Prauda par Madali”, kaida caurkrytuse konkursā “Supernova 2015”, nu naiztikšūt ari bez jaunu gobolu. Kai soka poši apvīneibys dalinīki – vysys dzīsmis byus par mīlesteibu, koč ari pasaruodeis taidys temys kai religeja, regionaluo ekonomika, emigraceja, nacionalais romantismys i cytys. “Kapļi” par sevi soka, ka jī ir poetiskuo roka apvīneiba, kurei nasabeist lītys saukt eistajā vuordā. Taišni saukt, na dzīduot, partū ka solists prīšknasumūs tai ari vaira runoj, na dzīž.

Albuma nūsaukumu “Ašņa dasys” apvīneiba skaidroj leidzeibuos – ašņa dasys asūt taids iedīņs, kurū kotru dīnu naād, bet pasnādz eipašūs gūdūs. Taipat klauseituoji teik breidynuoti, ka dasuos var gadeitīs ari pa kaidam traknuokam ašņa gabaleņam. Ašņa dasys byušūt īspieja paraudzeit ari eipašajā prezentacejis reizē.

“Kapļi” ir lapni, ka var pīruodeit – pat taidā Dīva damierstā Latgolys koktā kai Buozovā var topt kvalitatīva muzyka i īroksti.

Poestiskuo roka apvīneibys “Kapļi” sastuovs: Oskars Orlovs (Kapļu Kaplis), Arņs Slobožanins (Kaplis–divrūcs), Rasma Kulamova (varganis), Andris Jurjāns (Jurjāns Bum-Bum), Jurs Linužs (zamuos frekveņcis), Aija Čoiča i Juoņs Noviks (pīpyušamī instrumenti), Elgars Ludboržs (steigu instrumenti).

Informaceja sagataveita piec Latgolys viestnīceibys GORS dūtuos informacejis, publicitatis karteņa