Atkluots Ontana i Annes tematiskais parks

Atkluots Ontana i Annes tematiskais parks

Par speiti draudeigajim nagaisa muokūnim i leitam Baļtinovā 11. juļs tyka pavadeits pozitivā i satraukuma pylnā jutūnē – Ontana i Annes tematiskais parks pīdzeivuoja sovu atkluošonu.  

Projekta “Tev, man un visiem mums – lai top Baltinavā” golvonais mierkis beja izveiduot tautā zynomuos lugys “Ontans i Anne” tematiskū parku. Ideja par parka izveidi roduos bīdreibai “Jaunieši Baltinavai”, kas gribēja sakūpt sova dzymtuo nūvoda kulturviesturiskuos vītys, kurom seņču atmiņuos ir lela vierteiba. Vīna nu itaidu vītu beja Baļtinovys Vacais parks, kas godu gaitā beja pagaisynuojs sovu ogruokū spūdrumu, globojūt tū aiz aizaugušu upis krostu. I, pasasokūt Borisa i Inārys Teterevu fonda dūtajam atbolstam, bīdreibai “Jaunieši Baltinavai” beja vareiba eistynuot sovys īceris.

Parka atkluošonys pasuokums naiztyka bez svineiguos leņtis puorgrīsšonys, kas beja viestness par gryutuo dorba auglim. Leņtis puorgrīsšona tyka uztycāta Imantam Slišānam, Ontana lūmys atveiduotuojam, Anitai Ločmelei, Annes lūmys atveiduotuojai, i Lidejai Sileņai, Baļtinovys nūvoda dūmis prīšksādātuojai.

Piec svineiguos leņtis puorgrīsšonys beja daguojs laiks saceit pateiceibys vuordus vysim, kas paleidzēja parkam tapt tik unikalam. Bīdreibys “Jaunieši Baltinavai” puorstuovi beja sagatavejuši eipašus pateiceibys vuordus, sokūt paļdis nu sirds golvonajim atbaļsteituojim i struodeigajim paleigim par finansialū atbolstu i nasavteigi īguļdeitū dorbu.

Lelu gondarejumu bīdreibys jaunīšim deve lobī vuordi i atzineiba par dorbu, kas goda gaitā īguļdeits parka tapšonā. I juosoka, ka padareits patīsai ir daudz. Puor upi slīnās jauns tylts, iz kura īreikuoti sūleni dobys baudeituojim. Izveiduots bruga celeņš i Ontana i Annes silueti, pi kuru var nūsabiļdēt, īsajiutūt lugys varūņu tālūs. Izcalta lapine, kas ir breineiga atpyutys vīta parka apmaklātuojim, pastateitys šyupelis i foto rams dobā, kas ļaun īmyužynuot sevi, saimi i draugus breineiguos karteņuos, kai ari izgataveiti sūli i gunkura vīta pateikamys atmosferys radeišonai.

Sajiusmu kluotynasūšajūs radeja Imanta Slišāna duovona – Latgolys karūgs, kas tyka nūdūts bīdreibys “Jaunieši Baltinavai” prīšksādātuojam Ilgvaram Keišam.

Prūtams, Ontana i Annes tematiskuo parka atkluošona nabyutu tik zeimeiga, ka natyktu aizvadeita kūpā ar Ontanu i Anni. Partū sevkurs varēja baudeit teatra izruodi “Ontans i Vampiri”, īsaverūt, kai rodīs Ontana i Annes meilys stuosts.

Nūsaslādzūt pasuokumam, vysi kluotynasūšī varēja baudeit čaklū povuoreišu, Janinys i Ingridys, gordi pagataveitu zupu, baudūt kūpā byušonys laiku.

Atsaverūt iz padareitū, juosoka, ka dorbs ir īguļdeits lels i bīdreibys “Jaunieši Baltinavai” mierkis ir sasnāgts. Ir izveiduots i Ontana i Annes parks, i sakūpta parka teritoreja, kas niu prīcynoj sevkuru garumbraucieju. Dorbojūtīs kai breivpruoteigī, bīdreibys “Jaunieši Baltinavai” puorstuovi ir lepni par padareitū, partū ka skaita, ka myusu dīnuos cylvāki puoruok daudz gryb sajimt nikuo nadūmūt preteimā i materialuos vierteibys nūviertej augstuok nakai paleidzeigys rūkys dūšonu. Projekta realizacejis laikā bīdreibys jaunīši sakūpe na tik sova nūvoda kulturviesturiskuos vītys, nu ari styprynuoja sovu draudzeibu, dorbojūtīs vīnuotim mierkim, kai ari sajēme atbolstu nu cytu nūvodu dzeivuotuojim.

Informaceju sagataveja bīdreiba “Jaunieši Baltinavai”

??????????????????????