Zynomi dalinīki festivala „Osvalds 2015” jaunūs izpiļdeituoju konkursā

Zynomi dalinīki festivala „Osvalds 2015” jaunūs izpiļdeituoju konkursā

Jau itymā nedeļgolā Baļtinovys pusi pīskandynuos muzykys festivals „Osvalds 2015”. Festivala laikā nūtiks ari jaunūs izpiļdeituoju konkurss „Mana Dziesma 2015”, kurā byus vareiba jaunajim muzikim nu vysys Latvejis sevi pīruodeit iz skotuvis.

„Konkursa ideja ir dīzgon vaca, koč ari iz laiku puortraukta. Laikā nu 2001. da 2004. godam tyka reikuoti pyrmī konkursi, kurūs pīsadaleja taidys vāluok zynomys grupys kai „Borowa MC”, „Double Faced Eels”, Iveta Baumane i cyti. Jaunajom grupom vysod ir gryuts atrast uzastuošonys īspiejis, nu tikai uzastuojūt var motivēt sevi profesionalai izaugsmei ci vysmoz saprast sovys spiejis i vītu muzykā,” stuosta festivāla organizators Māris Lapāns.

Konkursu vērsīs i vērtēs profesionāla žureja Guntara Rača vadeibā, kūpā ar jū byus ari producents Jurs Nikonovs, radio dīdžejs i grupys „Borowa MC” liders Aigars Runčis, kai ari tautys bolsa puorstuovs i festivala atbaļsteituojs Andris Kindzulis. Tiks padūta ari publikys bolva.

Konkursam dasasacejušs ari vairuoki Latgolys muziki. Individualūs izpiļdeituoju grupā byus dzierdami treis dalinīki: Dagmāra Laicāne nu Bolvu, kas itymā reizē izpiļdeis liriska pop stila muzyku klavīru pavadejumā (Dagmāra pīsadalejuse ari LNT Dzīdūšūs saimu šovā), Auce Java nu Trapenis publiku prīcynuos ar pošys sacarātom dzīsmem pop žanrā, taipat ari duets „Paprika” nu Rēzeknis uzastuos ar pop žanra dzīsmem.

Konkursam dasasacejušs ari septeni kolektivi. Grupa „Dumplings” nu Bolvu par sevi stuosta, ka naseņ uzsuokuse dorbuotīs i puorsvorā izpylda cover versejis pop/rock stylā. „Šudiņ 5cūs” nu Rēzeknis ir grupa, kurā spieļoj pīcys mārgys i kūpā dorbojās nu 2014. goda oktobra. Grupa spieļoj gon pošu sacarātys dzīsmis, gon ari Latvejā i pasaulī pazeistamu dzīšmu kaverversejis. Itūšaļt suokts ari dorbs pi dzīšmu īrokstim skaņu īrokstu studejā.

Grupa „Melns uz Balta” nu Modūnis pastuov jau divus godus i, kai soka poši, – raunās vysur, kur viņ pasaruoda kaida īspieja. Grupys dalinīkim pateik roks i vyss, kas saistās ar tū.

Pīsadaleis ari Upeitis grupa „Unknown Artist”, kas par sevi soka: „Spieļojam vīnkuoršu muzyku, kurā nav nikuo golvu lauzūša i nareala, bet gon vīnkuoršys i vīgli uztveramys dzīsmis, kas izklaidej.”

Grupa „Everlust” sevi definej kai jaunu gothic rock/metal grupu nu Reigys. Grupai ir jau nalela skotuvis pīredze taiduos nūtikšonuos, „Studentu folkfestivāls” Jelgovā, „20 minūtes slavas” klubā „Depo” i akustiskī prīšknasumi kopejneicā „GetSmart”. Pīsadaleis ari Rekovys grupa „Napruots”, kurys dalinīki daleji dzeivoj Reigā. Jī sevi uzskota par jaunu, progresivu latgalīšu rokgrupu, kas nasabeist riskēt i lobpruot ļaunās dažaidim izaicynuojumim.

Taipat konkursa dalinīki ir ari grupa „Voice of Instruments” nu Ventspiļs. Grupa izveiduota 2013. goda vosorā, ansambļa muzykalajā volūdā apsavīnoj myusu dīnu ritmi i 21. godu symta akademiskuos muzykys elementi, izpyldūt originalmuzyku, kū komponej grupys dalinīki.

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]