Daugovpiļs teatris suoc jaunū sezonu

LaKuGa 6. Augusts, 2015. gods Comments Off on Daugovpiļs teatris suoc jaunū sezonu
Daugovpiļs teatris suoc jaunū sezonu

3. augustā Daugovpiļs teatra kolektivs sasatyka pyrmajā jaunuos sezonys saīšonā, kab piec teatra vaļdis prīšksādātuoja Olega Šapošnikova uzrunys, kai ari tradicionaluos kūpbiļdis suoktu intensivu dorbu pi sezonys jaunīstudiejumu.

Itei sezona Daugovpiļs teatra skateituojim sūlej puorsteigumus, i jau 11. septembrī gaidoma pyrmizruode V. Sigareva komedejai “Zudušu laimi meklējot”.

Oktobra vydā Daugovpiļs teatrī paradzāta pyrmizruode I. Kalmana operetei “Cirka princese” (rež. O. Šapošnikovs), kas byus operetis žanra atsagrīsšona iz Daugovpiļs teatra skotuvis. I. Kalmana operetis īstudiejums byus storptautiska leimeņa projekts, partū ka tymā pīsadaleis solisti nu Boltkrīvejis Vaļsts akademiskuo muzykaluo teatra – Galina Dubitska, Anzors Alimirzojevs. Izruodis muzykaluo vadeituoja i vīna nu golvonūs lūmu izpiļdeituojom byus operdzīduotuoja Ilona Bagele, Mistera X lūmu izpiļdeis jaunais, daudzsūlūšais baritons Igors Martaks. Operetis pyrmizruode gaidoma 16. oktobrī, i itamā dīnā tiks prezentāta ari teatra kritikis, muokslys zynuotneicys S. Geikinys gruomota par Daugovpiļs teatri, kas ir vīna nu zeimeiguokūs nūtikšonu teatra viesturē.

Itamā sezonā struoduot Daugovpiļs teatrī atsagrīzs režisors Mihails Mamedovs, īstudejūt divejis izruodis – i latvīšu trupā, i veidojūt Daugovpiļs teatra aktrisis Verys Hramnikovys benefici.

Novembrī jaunīstudiejumu pīduovuos Daugovpiļs teatra skateituojim jau zynomais režisors Jurs Jonelis.

Turpynojūt sasadorbuot ar boltkrīvu kolegim, itamā sezonā Daugovpiļs teatrī byus apsaveramys vairuokys Boltkrīvejis Vaļsts akademiskuo muzykaluo teatra gostu izruodis – septembrī koncertprograma “Operetis breinumainais pasauļs”, oktobrī muzykls bārnim “Zalta ciuoleits”, balets “Tyukstūš i vīna nakts”, decembrī Zīmyssvātkim i Jaunajam godam veļteiti īstudiejumi. Ari itūsezon gaidoma gostu izruožu apmaiņa storp Daugovpiļs teatri i Līpuojis teatri, Valmīrys dramys teatri, Dailis teatri, Latvejis Leļu teatri, kluotyn vēļ Daugovpiļs teatris ir suocs sadarbeibu ari ar Kaunis Vaļsts muzykalū teatri.

2015./2016. goda sezonā Daugovpiļs teatra akteru pulkam dasavīnuojs jauns akters – Mihails Abramovs, kuru skateituojim beja vareiba īpazeit īprīkšejuos sezonys pādejuo jaunīstudiejumā – komedejā “Apķērīgā mīlniece”.

Jaunajā sezonā suoks dorbuotīs jaunuo Daugovpiļs teatra sātyslopa, kura nu īprīkšiejuos atsaškiers ar myusdīneigu dizainu i sātyslopys apmaklātuojim vīgļuok lītuojamu informacejis izkuortuojumu.

Beletus iz septembra izruodem jau īspiejams īsaguoduot Daugovpiļs teatra kasē (654 26520) i škārsteiklā bilesuparadize.lv.

Komentari slāgti.