Preiļūs svieteis nūvoda svātkus

LaKuGa 13. Augusts, 2015. gods Comments Off on Preiļūs svieteis nūvoda svātkus

preilu svatki

Nu 21. da 23. augusta Preiļūs tiks svieteiti nūvoda svātki, kas itūgod īsasuoks ar vēļ nabejušu nūtikšonu – 1. storptautiskū autorleļu festivalu “Leļļu vasara Preiļos”.

Vysys treis dīnys Preiļu kulturys nomā byus apsaverama autorleļu izstuode. Kruošņuos 27 storptautiski atzeitu muokslinīku darynuotuos lelis 21. i 22. augustā varēs apsavērt nu 11.00 da 19.00, 23. augustā – nu 10.00 da 13.00. 21. augustā 15.00 nūtiks oficialuo izstuodis atkluošona i sasatikšona ar muokslinīkim. Uzaicynuojumam pīsadaleit festivalā atsasaukuši daudzi storptautiski atzeiti leļu muokslinīki nu Igaunejis, Krīvejis, Boltkrīvejis, Latvejis, Azerbaidžanys i Nīderlandis.

Organizatori sūlej, ka tikpat interesanta byušūt ari puorejuo svātku programa. 21. augustā 18.00 i 19.00 bārni tiks aicynuoti iz izruodem, sevkurs interesents varēs pīsadaleit salsys apvuiceibuos, nūtiks Īlu deju paraugdemonstriejumi.  Vokorā nūtiks svātku balleite, kurymā pīsadaleis muzykys grupys “Miggla”, “Dabasu durovys” i “Green novice”.

22. augustā jau nu poša reita – 7.00 – zyvu givieji aicynuoti iz pludeņmakškeriešonys saceņseibom Preiļu parka muorkā. Svātku programys reita daļa nūtiks Tierga īlā, dorbuosīs vysaidys rodūšuos darbneicys, pīpyušamuos atrakcejis bārnim, DBS autoškolys aktivitašu staceja, Lobdareibys Bumbu rallijs, E – mobilitatis veicynuošonys stends, Preiļu Golvonuos bibliotekys informativuo telts, Turisma informacejis centrs ar jaunumim par atpyutu Latgolā i cytys aktivitatis. 10.00 suoksīs Preiļu nūvoda tautys muokslys kolektivu koncerts, 11.00 prīcynuos Katrīnys Paulys Dīringys koncertprograma, nu 12.00 – muzykala rūtaļprograma bārnim ar lelajim puosoku tālim. Nu 10.00 da 13.00 i bārnim, i pīaugušajim byus vareiba nūsavērt svātku nūtikšonuos, vyzynojūtīs grafu Borhu karītē pa Raiņa bulvari.

Vīns nu atraktivuokajim momentim svātku programā byus nūvoda dzeivuotuoju, tautys muokslys kolektivu, uzjāmumu i īstuožu darbinīku Svātku guojīņs 22. augustā. Puļciešonuos guojīņam paradzāta 12.30 Preiļu piļsātys  stadionā. Guojīņa maršruts tuoļuok vierzēsīs pa Aglyunys īlu i Raiņa bulvari da laukuma preteimā nūvoda dūmei. Guojīņam paradzāts vīnuots nūformiejums heleja balonu veidā. Tai kai itūgod Preiļūs nūtiks ari leļu festivals, guojīņa nūformiejumā teik lyugts izmontuot lelis.

Piec guojīņa tiks sveikti konkursa “Sakūptuokais eipašums” dalinīks, kai ari varēs klauseitīs Viktora Zemgala i Roberta Gūbzeņa humoristiskū koncertprogramu. Nu 16.00 da 20.00 aktivuo dzeivisveida pīkritiejus tiks aicynuoti iz iudiņa atrakcejom i cytom aktivitatem Preiļu pludmalē.

21.30 dzeivuotuoji i nūvoda gosti sasatiks Preiļu parka estradē, kur Preiļu nūvoda Gūda pylsūņa zīme tiks padūta leļu muokslineicai Jelenai Mihailovai, nūtiks ari leļu festivala nominantu apbolvuošona.

Svātku dīna nūsaslēgs ar vierīneigu pasuokumu – 22.00 parka estradē – pasauļa popularuokūs kinu i muzyklu breivdobys koncertšovu “Tā nav dzīve, tas ir kino”. Piec šova – zaļumbals, kū spielēs Daiņs Skutelis ar grupu.

23. augusta reitā vysi teik aicynuoti iz svātku dīvkolpuojumim – 9.00 Preiļu staraveru bazneicā, 12.00 – Preiļu katuoļu bazneicā.

Komentari slāgti.