Augusta beiguos svieteis Kuorsovys nūvoda svātkus

LaKuGa 17. Augusts, 2015. gods Comments Off on Augusta beiguos svieteis Kuorsovys nūvoda svātkus
Augusta beiguos svieteis Kuorsovys nūvoda svātkus

Nu 22. da 30. augusta Kuorsovys nūvodā nūtiks tradicionalī nūvoda svātki, kuri pulcynoj dzeivuotuojus i gostus kūpeigā kulturys baudeišonā, sporta saceņseibuos i vītiejūs sātys ražuotuoju meistaruojumu baudeišonā.

Kai viestej Kuorsovys nūvoda sabīdryskūs attīceibu specialiste Inese Krivmane, nūvoda svātki īsasuoks ar sporta aktivitatem. Jau 22. augusta reitā Kuorsovys piļsātys tenisa kortūs nūtiks tenisa turnirs i 25. augustā pludmalis volejbola saceņseibys. 27. augustā jau īcīneitais Nakts strītbols i 30. augustā minifutbola saceņseibys, kai ari byus vareiba puorbaudeit sovus spākus īlu vyngruošonā, dambretē, šautreņu svīsšonā i saušonā mierkī.

23. augustā 11.00 Malnovys maizneicā “Dzīles” Bārtuļa dīnys tiergs ar omuleigu atmosferu i nasteidzeigom breivdīnu reitiškom uorpus sātys, kurymā byus vareiba degustēt Latgolys sātys ražuotuoju produkceju.

Kulturys programa suoksīs ar Jaunīšu dīnu 28. augustā Saļņovys breivdobys atpyutys laukumā, kuru pīskandynuos jaunūs talantu koncerts. Piečuok balleite rokenrola rytmūs, kurus nūdrūšynuos grupa “Breathe Today”. Iz pasuokuma vītu 19.00 dūsīs “Party Bus”, kurs apmaklātuojus īsiļdeis vokora pasuokumam.

Nūtikšonom pīpiļdeituokuo dīna byus 29. augustā, kur reits suoksīs ar piļsātys mūdynuošonu i Svātū Mišu 10.00 par Kuorsovys nūvoda ļaudim Malnovys Rūžukrūņa Dīvmuotis Rūmys Katuoļu bazneicā. 11.00 pi “Krosta estradis” puļcēsīs omotnīki i sātys ražuotuoji ar sovu gordū i kvalitativū produkceju. 12.00 “Krosta estradē” jaundzymušūs Kuorsovys nūvoda dzeivuotuoju sveikšona i uorvaļstu gostu koncerts.

Nu 14.00 vysi teik aicynuoti pīsadaleit rodūšajuos darbneicuos, kur byus vareiba pošu rūkom radeit vysaidys lītys, īsavuiceit gatavēt smuordleleitis i dabuot skaistu kermiņa rūtuojumu – zeimiejumu ar hennu. Sovukuort Vaļsts rūbežsardze apmaklātuojim pīduovuos kinologu i dīnasta suņu paraugdemonstriejumus.

Svātku vokora daļu atkluos kruošņuo “Saļņavīšu paruode” pa Vīneibys īlu, kura suoksīs 18.00 nu Kuorsovys dzeļža ceļa puorejis iz “Krosta estradi”. Estradē varēs apsavērt i viertēt zīdu pakluojus, cīnuotīs ar čaju i pīsadaleit atmiņu īmyužynuošonā – fotosesejā. 19.00 koncerts “Vērtības, kas nerūs”, kurymā pīsadaleis Saļņovys KN amaterkolektivi i uorvaļstu gosti.

21.00 Večerinka ar tautys muzykantim, muzicēs kapelys “Sābri”, “Danču muzikanti” i lītaunīku kapela nu Zipļu. 23.00 svātku salūts i zaļumbals, kurymā spielēs “Dvinskas muzikanti” ar Juri Ostrovski i  VIA ”p.s. SALA”.

Komentari slāgti.