Aicynoj atbaļsteit dzejis i foto albuma “Latgales sirdspuksti” izdūšonu

LaKuGa 19. Augusts, 2015. gods Comments Off on Aicynoj atbaļsteit dzejis i foto albuma “Latgales sirdspuksti” izdūšonu
Aicynoj atbaļsteit dzejis i foto albuma “Latgales sirdspuksti” izdūšonu

Kolektivuo īguļdejuma platforma “Projektu banka” aicynoj atbaļsteit bīdreibys “Balvu olūts” izveiduotuo dzejis i foto albuma “Latgales sirdspuksti” izdūšonu. Albumā ir apkūpuoti 150 Latgolys dzejnīku i fotografu dorbi – dzeja i latgalīšu, i latvīšu literarajā, i krīvu, kai ari pat boltkrīvu volūdā.

Bīdreibys “Balvu olūts” vaļdis lūceklis Uldis Arnicāns par “Latgales sirdspukstiem”: “Latgolys cylvāki ir myusu nūvoda leluokuo i skaistuokuo vierteiba. Pasasokūt myusu cylvākim, Latgola ir varējuse pastuovēt i saglobuot tai rakstureiguos īzeimes daudzu godsymtu garumā. Kab pasasaceitu vysim Latgolys cylvākim par jūs nasavteigū dorbu i goreigūs vierteibu kūpšonu daudzu godu garumā, ir radeita itei gruomota, kurymā myusu nūvodu dzejnīki i fotografi atainoj vakar i šudiņ svareiguos temys. Kotrs myusu nūvoda cylvāks ir kai vīns mozs sirdspuksts, kas ļaun myusu Latgolys sirdei pukstēt, partū ka taišni nu myusu ir atkareigs, voi ari iz prīšku sovu nūvodu redzēsim taidu, kaidu tū asam pīroduši redzēt – meiļu, saprūtūšu i cīši dvēselisku. Lela prīca, ka dorbā variejom apvīnuot autorus ar dažaidim redzīnim i tauteibom nu vysim 20 Latgolys nūvodim, tai atspīgeļojūt vysys Latgolys daudzpuseibu i kruosaineibu. Itys kūpdorbs ir breineigs pīmārs tam, ka, nasaverūt iz nacionalajom, kulturalajom i religiskajom atškireibom, vysi myusu nūvodu dzeivuotuoji lepojās ar sovu skaistū Latgolu i paleidz tai byut par syltu sātu mums vysim.”

Itūšaļt albuma “Latgales sirdspuksti” izdūšonai vajadzeigī leidzekli teik vuokti kolektivuo īguļdejuma platformā Projektu banka. Tai sevkuram Latvejis dzeivuotuojam ir vareiba īguļdeit kaidu eiro albuma topšonā. Da šam “Latgales sirdspukstu” izdūšonu jau ir atbaļstejušys 6 Latgolys (Viļakys, Dagdys, Kruoslovys, Viļānu, Krystpiļs i Rēzeknis piļsātys) pošvaļdeibys i poši gruomotys autori. Nu 4600.00 EUR gruomotys izdūšonai vajadzeigi vēļ 2600.00 EUR. Par itū naudu tipografejā tiks īspīsti 1000 albumi, nu kurim 500 albumi tiks Latgolys školu, pogostu i piļsātu bibliotekom, sovukuort puorejī 500 eksemplari tiks autoru, atbaļsteituoju i pošvaļdeibu eipašumā.

Atbolstūt “Latgales sirdspuksti“ izdūšonu, sevkurs, kurs īguļdeis 15 eiro, sajims vīnys gruomotys eksemplaru pa postu voi kaidā nu gruomotys atkluošonys pasuokumim, īguļdejūt 50 eiro, jiusu vuords i pavuorde voi uzjāmuma logo tiks īkļauts gruomotys titullopys atbaļsteituoju sarokstā.

Komentari slāgti.