Baļtinovā realizāts projekts “Mācāmies būt par sava amata meistariem”

LaKuGa 19. Augusts, 2015. gods Comments Off on Baļtinovā realizāts projekts “Mācāmies būt par sava amata meistariem”
Baļtinovā realizāts projekts “Mācāmies būt par sava amata meistariem”

Pyrma goda, 1. augustā, tyka suokta projekta “Mācāmies būt par sava amata meistariem” (projekta Nr. 2013.EEZ/PP/1/MIC/015/037) realizaceja. Projekts tika finansiali atbaļsteits Islandei, Norvegejai i Lihtenšteinai, kūpiejuos projekta izmoksys beja 20637.79 EUR, nu kuru 89,98% beja Sabīdreibys integracejis fonda finansiejums.

Par projektu
Nu jau realizātais projekts “Mācāmies būt par sava amata meistariem” tyka izstruoduots Baļtinovys nūvoda bīdreibai “Sukrums”. Projekta izvierzeitais mierkis beja veicynuot socialuos atstumteibys i nabadzeibys ryskam pakļautūs dzeivuotuoju pošapzinis ceļšonu, rodūšū izaugsmi, izgleituošonu i daleibu orudi.lv darbeibā, tai stimulejūt socialū īsakļaušonu i mozynojūt navīnleidzeibu sabīdreibā.

Goda ītvorūs bīdreiba “Sukrums”, sasadorbojūt ar bīdreibom “Saulessvece” i “Kūzuls”, veice vysaida rakstura aktivitatis, kab sasnāgtu izvierzeitū projekta mierki. Kotru mienesi interesentim tyka dūta naatkuortojama vareiba apmeklēt kaidu no 11 rodūšūs darbneicu, kuruos organizēja i planavuoja kaida nu projektā īsaisteitajom bīdreibom. Bīdreiba “Sukrums” nūdrūšynuoja vareibu apmeklēt taidys rodūšuos darbneicys kai floristikys kursus i rūtyslītu gataveišonu Ingridys Olipovys vadeibā i kūkapstruodis kursus kūpā ar Raimondu Leicānu. Jaunys īmanis vuiceitīs varēja ari bīdreibys “Saulessvece” organizātajuos nūdarbeibuos, apmeklejūt šyušonys, ausšonys i origami meistardarbneicys Sandrys Pakalneitis vadeibā, smeļt zynuošonys piertsslūtu sīšonā kūpā ar Jugitu Boldāni, kai ari vuiceitīs kūpā ar Līnu Punduri gatavēt snīgaveirus i zīmeļbrīžus nu dzejis. Sovukuort bīdreibys “Kūzuls” organizātajuos nūdarbeibuos varēja izzynuot Latgolys kuknis nūslāpumus kūpā ar Ilonu Čoiču i Mūdreiti Leli, īsavuiceit sīt gordus sīrus Elvirys Bleivis vadeibā, kai ari īsapazeit ar Latvejis dobu i īvuokt čajus zīmai, konsultejūtīs ar sātys ražuotuoju Annu Danču. Kab sevkurs varātu kavētīs pateikamuos atmiņuos par kūpā pīdzeivuotū laiku i sasnāgtajim rezultatim, Omotnīku centrā izveiduota fotografeju izstuode ar spylgtuokajom šaļtim nu rodūšajom darbneicom.

Projekta ideja veiduojuos reizē ar gribiešonu īdvasmuot nūvoda ļauds byut sociali aktivuokim i vuiceitīs vys jaunys īmanis i prasmis. Kab motivātu dzeivuotuojus, bīdreiba “Sukrums” veiduoja dokumentalūs sižetus par omotnīkim, kuri ar sovu dorbu izkruosoj i sovu, i ari sev tyvūs i meiļūs cylvāku kasdīnu. Dokumentalī sižeti tyka veiduoti i par pierļuotuojom, i par piertnīku, i sveču liejieju, i motu rūtu gataveituoju i vēļ daudzim cytim unikalim i naatkuortojamim talantim. Filmejūt i apstruodojūt dokumentalūs sižetus, bīdreiba “Sukrums” īpazyna sova nūvoda rodūšūs ļauds i apsazynuoja, cik patīseibā apleik ir daudz talanteigu omotnīku, par kuru prasmem cyti nimoz nazyna.

Taipat projekta ītvorūs tyka reikuoti VID izgleitojūši informativī seminari, kurymūs sevkurs varēja atrysynuot naskaidrūs vaicuojumus, kab sovu saimnīcyskū darbeibu veiktu lykumeigi. Seminarus vadeja Irina Markova, kura ir specialiste itaida rakstura vaicuojumu rysynuošonā.

Emocejom i īspaidim vysboguotuokais beja pīredzis apmainis braucīņs, kur sevkurs smēlēs jaunys idejis i īdvasmu, kab veicynuotu sovu rodūšū izaugsmi. Pīdzeivuojumim i īspaidim boguotajā dīnā tyka braukts iz Kroma kolnu, vērtīs, kai, sekojūt sovim sapynim, ļauds ir imitiejuši 9. – 13. gs. kulturvidi i īsaistejuši sovuos aktivitatēs daudzus vysaidu omota prasmu pīkūpiejus, kab kūpeigai veiduotu montuojumu cytom paaudzem. Gastejūt pi pūdnīka Ilmara Veceļa, sevkurs varēja uzjimt pozitivu energejis luodeņu, vārojūt meistara rūku veikleibu, i apbreina pylnom acim redzēt Ilmarā apjiemeibu i mīlesteibu pret sovu dorbu. Pīredzis braucīņa nūslāgumā tyka sajimtys pozitivys emocejis kūpā ar bīdreibu “Ūdenszīmes” Kaldubruņu školā. Pasasokūt bīdreibai “Ūdenszīmes”, tyka styprynuota apziņa, ka nivīns lobais dorbs nav mozsvareigs i, kab sasnāgtu vys jaunus pīredzis apvuoršņus, vajadzeiga naatlaideiba i ticeiba sovim spākim.

Gods paskriejs namonūt, padareits i pīdzeivuots ir daudz. Bīdreiba “Sukrums” skaita, ka, kūpeigi dorbojūtīs, kotrs mozais nūvodeņš var byut dyžans – ar panuokumim, rodūšim ļaudim, naizseikstūšu energeju i lelim dorbim.

Sadarbeiba turpynuosīs
Bīdreiba “Saulessvece” ar bīdreibu “Sukrums” sadarbeibu jau izveiduojuse seņ, partū kotra vareiba styprynuot sovstarpiejuos attīceibys teik izmontuota. Kai vīns nu kūpiejim sadarbeibys rezultatim ir virtualuo e-kataloga orudi.lv izstruode. Bīdreiba “Saulessvece” lepojās ar sova pogosteņa kuplū omotnīku skaitu i daleiba projektā “Mācāmies būt par sava amata meistariem” deve breineigu vareibu sovuos zynuošonuos i boguotajā pīredzis kluostā daleitīs ar cytim. “Mums nabeja šaubu, ka projektā nūteikti ir juopīsadola,” soka Siļveja Ločmele, bīdreibys “Saulessvece” prīšksādātuoja.

Siļveja Ločmele ar projekta sasnāgtajim rezultatim ir apmīrynuota i soka, ka projekts “Mācāmies būt par sava amata meistariem” sadarbeibys saitis ar bīdreibu “Sukrums” ir styprynuojs i, prūtams, ka var symtprocenteigai apgolvuot, ka itys nabyus pādejais kūpeigais projekts. Kūpeigai apsavīnojūt dažaidu ideju realiziešonai bīdreibu spāks, zynuošonys i reizē ar tū pieredze tik vairojās.

“Viertejūt kūpiejū sajimtū nu projekta realizacejis, juouzsver, ka pīredze, kas ir sajimta ir naatsverama, ir īpazeiti tyvuokuos apleicīnis omotnīki i styprynuots lepnums par myusu pošu talanteigajim ļaudim,” uzsver Siļveja Ločmele.

Sajimta naatsverama pīredze
Kotram pogosteņam pīmeit sova unikalitatis dzierksts. Sovu darbeibu bīdreiba “Kūzuls” suoce 2006. gadā par sovu golvonū mierki pastotūt sabīdreibys interesis veicynuošonu par tradicionaluo kulturys montuojuma saglobuošonu, paleidzūt atjaunuot pošapziņu, apsazynojūt sevi par goreigi boguotu tautu, kai ari īsaisteit socialuos atstumteibys ryskam pakļautūs dzeivuotuojus pogosta dzeivis aktivitatēs.

Bīdreiba “Kūzuls” projekta “Mācāmies būt par sava amata meistariem” ītvorūs nūorganizēja rodūšuos darbneicys, kas deve vareibu popularizēt vītiejūs omotnīku omota prasmis, nu rodūšūs darbneicu apmaklātuojim tikt pi jaunu īmaņu i zynuošonu. “Kūpeigai organizejūt rodūšuos darbneicys sajēmem pīredzi i rodom jaunys idejis. I ir lela prīca, ka sovus talantus mes varam paruodeit ari pasauļam,” soka bīdreibys “Kūzuls” puorstuove Valentina Kirsanova.

Bīdreibai “Kūzuls” itys beja pyrmais lelais projekts, kurymā tik lelā mārā tyka veicynuota sadarbeiba ar kaidu cytu bīdreibu. Atsaverūt iz padareitū, bīdreibys puorstuovi secynoj, ka sadarbeiba ir izaveiduojuse pozitiva i, ka viņ byus taida vareiba, sadarbeibu ar bīdreibu “Sukrums” nūteikti styprynuos.

Rokstu sagataveja bīdreibys “Sukrums” puorstuovi

?????????????????

Komentari slāgti.