12. septembrī Rēzeknis nūvodā nūtiks izcyluo fotomuokslinīka Juoņa Gleizda pīmiņai veļteiti pasuokumi.

Kai informej Latgolys Fotografu bīdreibys prīšksādātuojs Igors Pličs, dīna tiks īsuokta ar majā Rēzeknis nūvodā nūtykuošuo Juoņam Gleizdam veļteituo fotoplenera laikā radeitūs dorbu izstuožu atkluošonom dažaiduos Rēzeknis nūvoda vītuos – pošvaļdeibys ākys foajē, Leņdžu pogosta kulturys nomā, Bieržgaļa pogosta kulturys nomā, Nautrānu pogosta kulturys nomā – sporta halā, Iļžukolna pogosta tautys nomā.

Dīnys nūslāgumā paradzāta pīminis vītys atkluošona Juoņa Gleizda dzymtajā sātā Iļžukolna pogosta Vacgailumūs.

Īvāruojamais fotomuokslinīks dzims 1924. goda 7. majā Rēzeknis apriņča Iļžukolna pogosta Vacgailumūs. Ar fotografeju jis suoce nūsadorbuot 1951. godā. Vysaiduos izstuodēs jis pīsadalejs nu 1962. goda, puors godus vāluok suoce pīsadaleit ari storptautiskajuos izstuodēs. Pyrmuo nūzeimeiguo personalizstuode nūtyka 1977. godā Reigā.

Puorsvorā Juoņs Gleizds struoduoja malnboltajā fotografejā, meistareigi izmontojūt sarežgeitū izohelejis tehniku. Īspiejams, vyslobuok zynomys Juoņa Gleizda sīvīšu aktu fotografejis, tok jis dorbuojīs ari cytūs žanrūs – ainovā, klusajā dobā, portretu fotografejā.

Nasaverūt iz tū, ka pādejūs godus J.Gleizds beja cīši slyms, juo fotografeju kolekcejis tyka eksponietys Lītovā, Rumanejā i Ukrainā. Pādejuo izstuode “Jāņa Gleizda atgriešanās mājās” 2009. goda rudinī beja kai atvodu sveicīņs Lendžu pogostā.

Juoatzeimoj, ka 24 godu vacumā fotografu beja pīmeklēja lela nalaime – piec smogu apsaļdejumu jam tyka amputātys obejis rūkys. Ituo īmasla dieļ muokslinīka dzeive i rodūšais myužs vysā tuo garumā beja kai spylgts cylvāka grybysspāka i dzeivisspora aplīcynuojums.

Juoņs Gleizds myužeibā nūguoja 2010. goda 17. aprelī.