Turpynojās dasaceišona Nikodema Rancāna bolvai

LaKuGa 25. Augusts, 2015. gods Comments Off on Turpynojās dasaceišona Nikodema Rancāna bolvai

Rēzeknis Latgalīšu kulturys bīdreiba izsludynuojuse Nikodema Rancāna bolvu izcylvuokajim Latgolys pedagogim. Latgolys regiona školys (ari augstuokuos izgleiteibys īstuodis) teik aicynuotys nūsaukt kandidatus četruos nominacejuos.

13. septembrī paīt 145 godi, kai Ludzys apriņķa Zaļmuižys pogostā (tān – Rēzeknis nūvoda Nautrānu pogosts) dzims izcylais katuoļu goreidznīks un pedagogs, Latgolys pyrmuos atmūdys darbinīks, monsinjors Nikodems Rancāns (1870–1933). Lai gūdynuotu juo īspaideigū davumu Latgolys kulturā un izgleiteibā, Rēzeknis Latgalīšu kulturys bīdreiba īrūsynoj īdybynuot Nikodema Rancāna bolvu Latgolys izcyluokajim pedagogim. Itei bolva tyktu daškierta reizi godā, 13. septembrī, vyspuorejuos un pamatizgleiteibys izgleiteibys īstuožu školuotuojim, kai ari augstuokūs un videjūs profesionalūs vuiceibu īstuožu vuiceibspākim par īvāruojamu īguļdejumu vuiceibu dorbā, latvyskuos un latgaliskuos kulturys un tradiceju īaudzynuošonā jaunajā paaudzē.

Bolvys mierkis ir na tikai Nikodema Rancāna pīminis saglobuošona, bet ari školuotuoju profesejis populariziešona un juos prestiža paaugstynuošona sabīdreibā, atzeimejūt izcylu un pošaizlīdzeigu pedagogu dorbu.

Nikodema Rancāna bolvys pretendentus vairuokuos nominacejuos, pīmynūt juo daudzveideigū pedagogiskū darbeibu, izviertēs žureja, kurys sastuovā tiks aicynuoti Izgleiteibys un zynuotnis ministrejis, Latgolys nūvodu pošvaļdeibu puorstuovi, izgleiteibys un kulturys darbinīki. Bolvys padūšonys svineiguo ceremoneja kasgods tyktu reikuota 13. septembrī kaidā nu Latgolys pošvaļdeibu, itei dīna palyktu par Latgolys Školuotuoju dīnu.

Bolva tiks daškierta četruos kategorejuos:

1. Par īguļdejumu un sasnāgumim latgalīšu volūdys, kulturviesturis un nūvoda vuiceibys īvīsšonā un īdzeivynuošonā školys/augstuokuos izgleiteibys īstuodis vuiceibu/ studeju vidē.
2. Par inovacejom izgleiteibys procesā (jaunu metožu, pīeju, strategeju, modernūs tehnologeju dalītuojumu vuiceibu un audzynuošonys dorbā, metodiskūs dorbu izstruodnis, publikacejis, pīredzis popularizeišona, dorbs ar vacuokim i. c.).
3. Par myusdīneigu un rodūšu pīeju školānu dorba tykuma audzynuošonai un omotu apvuiceibai.
4. Par veiksmeiguokū jaunuo pedagoga debeju (iniciativa, spieja aizraut, īinteresēt, motivēt školānus, inovacejis i. c.) (pedagogi, kuru dorba stažs napuorsnādz treis godus).

Konkursa nūlykums i dasacejuma anketa.

Komentari slāgti.