Bolvūs nūtiks tradicionalais kamermuzykys festivals

LaKuGa 26. Augusts, 2015. gods Comments Off on Bolvūs nūtiks tradicionalais kamermuzykys festivals

Augusta pādejā nedeļgolā Bolvu muižys koncertzalā jau sešpadsmytū reizi nūtiks Bolvu kamermuzykys festivals.

Festivals tiks atkluots 29. augustā 17.00 ar koncertu “Romantiskā Parīze”, kurymā Līpuojis steigu kvartets skaneigā saspielē ar mežroga meistaru Daini Tarasovu izbūrs Parīzis nūskanis. Piļsāta atspeidēs Franča Lista školuotuoja Antuāna Rejhys, imperatora Bonaparta muzika Luija Fransuā Doprā klasiskajuos harmonejuos, kai ari šarmantuo meilinīka Debisī napastuoveigūs tonalitašu kruosuos.

20.00 Bolvu muižys koncertzalā izskanēs koncertprograma “Eksotiskās dejas”, kurymā “Sinfonietta Rīga” pyutieju kvintets, kurs pīcu godu darbeibys laikā sevi ir aplīcynuojs kai breineigs kameransamblis, sasateik ar Latvejā jau ilgu laiku dzeivojūšū lītaunīku saksofonistu Arvīdu Kazlausku. Itymā koncertā klauseituojim byus vareiba baudeit i originalmuzyku, kas raksteita taišni itaidam naīrostam instrumentu sastuovam, i ari vairuokus aranžiejumus. Koncertprogramys konceptualū pamatu veidoj skaņdorbi, kas taidā voi cytā veidā ir saisteiti ar eksotiskajom zemem. Koncertā klauseituojim tiks pīduovuotys Alžīrejis i Meksikys autoru originalkompozicejis, kai ari francužu Žana Fransē (Jean Francaix) i Darjusa Mijo (Darius Milhaud) ceļuojumu īspaidi aranžiejumūs.

Ari svātdiņ, 30. augustā, paradzāti diveji koncerti. 15.00 izskanēs koncerts “Grand Duo”, kura pamatdūma baļsteita veidojūt klasisku koncertprogramu, kas naatstuos vīnaldzeigu na kasdīnišku klauseituoju, na ryudeitu muzykys pazinieju. Itūreiz kai koncepcejis vīnuojuošais elements izvālāta diveju instrumentu saspēle ar vīnleidzeigim spēlis nūteikumim vysaidu laikmatu i stilu muzykā, partū ari koncertprogramys nūsaukums pajimts nu K. M. Vēbera Leluo koncertdueta klarnetei i klavīrem. Obeji koncerta muokslinīki Agnese Egliņa i Mārteņš Circenis Latvejis kulturys dzeivē ir labi zynomi, kūpā spielejūt jau vaira kai desmit godus īpazynuši skotuvis spēlis nūteikumus i sajāmuši ari publikys atzineibu i vītiejūs koncertzalūs, i uorzemēs.

Festivala nūslāgums byus koncerts “Dainu skapis”, kura suokys 30. augustā 19.00. Koncertprogramā vokaluo grupa “Framest” kūpā ar muziki i komponistu Raimondu Tigulu izpylda muzyku, kas atspīgeļoj grupys dalinīku izceļsmi, latvīšu tautys tradicejis i myusu vidi, kurymā dzeivojam – tys ir latvīšu muzykys “spiričuels”. Koncertprograma ir muzykalu vaicuojumu rezultats, kur tradicionala melodeja teik ītārpta formā, rytmā i harmonejuos, kas ir aktuala i myusu dīnu akademiskuos muzykys, i ari estradis muzykys vidē.

Balvukamermuzika_A1

 

 

 

Komentari slāgti.