Gordi nūsvieteiti Kuorsovys nūvoda svātki

Gordi nūsvieteiti Kuorsovys nūvoda svātki

Aizvodūt vosoru i sagaidūt rudineigū ražu, Kuorsovys nūvodā kotru godu puļcejuos nūvodnīki i gosti, kab māruotūs spākim sporta saceņseibuos, baudeitu vītiejūs sātys ražuotuoju meistaruojumus tierdzeņā i kūpeigi atsapyustu boguoteigajā svātku programā.  

Ar gordu muti īsakūžūt svātkūs

Latvīšu tradicejuos Bārtuli ir tierga dīna, rudzu siejis laiks, partū ari Malnovys maizneicys “Dzīles” pogolmā 23. augustā nūtyka tiergs ar mīluošonūs, sarunom i svātku īskandynuošonu nūvodā. Vysod gostmīleiguo saimineica Aina vysus kluotynasūšūs aicynuoja iz picu meistarklasi, kur beja īspiejams gatavēt tradicionaluos picys i īpazeit latgalīšu picu ar sipisnīku.

Sportiskā mīsā vasals gors

Nūvoda svātki īsasuoce aktivi sportojūt – nūvodnīki i gosti sasaceņte tenisa meistareibā, tyka nūskaidruota prasmeiguokuo volejbolistu komanda. Par gūdu svātkim nūtyka strītbola i 3×3 ghetto florbola nakts turnirs “Pi kuojis nakts!”, kuru nūslēdze drifta paraugdemonstriejumi.

Pādejā nūvoda svātku dīnā Kuorsovys vydsškolys laukumā puļcejuos tī, kuri sovus spākus gribieja puorbaudeit īlu vyngruošonā, dambretē, šautreņu svīsšonā i saušonā mierkī. Itamā dīnā nūtyka ari minifutbols, kurymā pīsadaleja Boltkrīvejis sadraudzeibys piļsātys komanda nu Puhoviču. Ceiņa beja seiva, nu kauss tok palyka pi laukuma saiminīku komandys “Sporta klubs “Kuorsova”” .

Jaunīši pīskandynoj Saļņovu

Iz pasuokuma vītu jaunīši devēs ar “Party Bus”, kurs apmaklātuojus īsiļdeja vokora pasuokumam. Svātku ītvorūs uzastuoja gosti nu Šliserburgys, Brīžucīma īlu vyngruotuoji demostrēja unikalu īlu vyngruošonys šovu. Saļņovys talanteigī doncuotuoji vylynuoja skateituojus kustētīs myusdīneigūs deju rytmūs, Kuorsovys Muzykys i muokslys školys audziekni prīcynuoja ar stilizātu tautystārpu šovu. Iz skotuvis puļcejuos aktivuokī Kuorsovys nūvoda talanti.

Tierga tradiceja Kuorsovā svietej 190. godskuortu

Viesturiski Kuorsovys nūvods ir veiduojīs krystceļūs stop senejū tierdznīceibys ceļu, kas nu Krīvejis vidīnis vede iz Baļtejis jiuru, partū, pasasokūt itim stratiegiski svareigajim celim ite izaveiduojusēs seneja tierguošonuos tradiceja, kura dzeivoj vēļ itūšaļt. Par gūdu svātku dīnai Kuorsovā puļcejuos sātys ražuotuoji, kas lutynuoja ar gordim peirāgim, kapceitom zivim i cytim lauku lobumim. Sovukuort omotnīki pīduovuoja i rūtys skaistumam, i dekorus sātom, breineigys duovonys i suvenirus nu Kuorsovys nūvoda svātku.

Jaundzymušī kuorsavīši – prīca i lepnums

Jau vairuoku godu garumā par jauku tradiceju palykuse jaundzymušūs sveikšona. Nūvoda svātkūs jaunuokajim nūvoda dzeivuotuojim veļteitajā koncertā puļcejuos jaunuos saimis, kai ari pošvaļdeibys puorstuovi, kab gūdynuotu jaunuokūs nūvoda dzeivuotuojus.

Guojīņs puļcej 52 Saļņovys cīmus

Kotru godu nūvoda svātku organiziešona teik uztycāta kaidam nu pogostu, itūgod tys gūds beja saļnavīšim. Iz svātku koncertu nu Saļņovys pusis īsaroda ryucūša, kolorita salņavīšu paruode, kurymā apsavīnuoja 52 cīmi. Guojīņa apmaklātuoji redzēja i nūpītnu traktortehniku, i izpuškuotys mašynys, i tricyklu ar pleivojūšu Latgolys karūgu.

 “Vierteibys, kas naryus”

Kuorsovys “Krosta estradē” beja īspiejams apsavērt kotra pogosta ar zīdim rūtuotūs sīna ruļļus, kurūs tyka īveitys lobuos dūmys nūvoda dzeivuotuojim. Koncertā tyka gūdynuoti sakūptuokūs sātu saiminīki, kuri, spūdrynojūt sovys sātys, veidoj ari nūvodu skaistu i sakūptu. Lelu sajiusmu i apmaklātuoju gavilis sajēme grandiozais saluts, kurs izplauka nakts tymsā puor Kuorsovys piļsātu, skateituoji atzyna: “Svātki ir izadavuši!”

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]