Suokušuos Daugovpiļs nūvoda dīnys

LaKuGa 8. Septembris, 2015. gods Comments Off on Suokušuos Daugovpiļs nūvoda dīnys

Nu 7. da 19. septembra nūteik tradicionaluos Daugovpiļs nūvoda dīnys, kurys jau sastū godu teik reikuotys ar mierki veiduot nūvoda popularitati, atbaļsteit vītiejuos tradicejis i ražuotuojus, kai ari veicynuot lauku ražuotuoju i tautys montuojuma produktu atteisteibu. Kai kotru godu, nūvoda dīnys byušūt aizraujūši, izzynūšom i sportiskom aktivitatem pīsuotynuoti svātki vysai saimei.

Turpynojūt pārņ aizsuoktū “Pogostu dyžuošonuos” tradiceju, itūgod Kolupa, Neicgaļa, Leiksnys i Vabalis pogosti ruodeis, ar kū tī ir stypri i boguoti. Diveju nedeļu garumā itymūs pogostūs nūtiks vysvysaidi pasuokumi – izstuodis, meistardarbneicys, sporta aktivitatis, konkursi, vidis objektu atkluošona i attaiseitūs durovu dīnys pi uzjiemieju.

18. septembrī Daugovpiļs olimpiskajā centrā nūtiks Latvejis Tierdznīceibys i ryupnīceibys kamerys i Latgolys planavuošonys regiona reikuotuos “Uzņēmēju Dienas Latgalē 2015”, sovukuort svātku kulminaceja gaidoma 19. septembrī ar kruošņu rudiņa Godatiergu Daugovpiļs piļsātys teritorejā, Reigys īlā (pūsmā da Gimnazejis īlys) i Dubrovina parkā. Godatiergā byus vareiba īsaguoduot Daugovpiļs nūvoda ražuotuoju, Latgolys tierguotuoju i omotu meistaru daudzveideigū produkceju – sīru, madu, maizi, duorzuojus, veinus, dekorativūs stuodus, augļus i ūgys, rūkdorbus i izstruoduojumus nu kūka, muola, kūkvylnys i lyna. Pierkūt precis nu Daugovpiļs nūvoda tierguotuoju na mozuok kai 3 eiro vierteibā, sevkurs pierciejs sajims vīnu talonu “Lauku gordumu īlys” iedīņu degustacejai.

Godatierga dalinīkus sagaideis ploša i interesanta kulturys programa. Ar dzīsmem, dejom i teatra izvadumim godatiergu īskandynuos i vītiejī muokslinīciskuos pošdarbeibys kolektivi, i gosti nu Boltkrīvejis – Braslovys rajona Kulturys noma tautys teatris “Pokers”, Glubokoje rajona folklorys tautys teatris “Tereško” i Šarkovščinys Kulturys centra Tautys muzykys ansamblis “Spadčina”. Koncerts nūsaslēgs ar Tihovsku saimis ansambļa muzykalū sveicīni.

Apmaklātuojim byus vareiba apsavērt fotoizstuodis “Kalupes, Līksnas, Nīcgales, Vaboles pagasti tuvplānā” i “Mežos, upēs, ezeros”, Latgolys Zooduorza ekspoziceju “Eiropas retā herpetofauna Daugavpils novadā”, kai ari guņsdzieseibys tehnikys i specialuo apreikuojuma demonstraceju. Interesenti aicynuoti pīsadaleit Daugovpiļs nūvoda školānu i jaunīšu, muzeju i Daugovpiļs Universitatis reikuotajuos rodūšajuos darbneicuos.

Atzeimojūt Eiropys sadarbeibys dīnu, nūtiks ari dažaidi Daugovpiļs nūvoda dūmis eistynuotūs projektu pasuokumi Eiropys sābru attīceibu i partnereibys instrumenta Latvejis – Lītovys – Boltkrīvejis puorrūbeža sadarbeibys programys 2007. – 2013. godam ītvorūs.

Vysys dīnys garumā Vīneibys laukumā tiks reikuotys sporta aktivitatis – Daugovpiļs nūvoda tradicionaluos storptautiskuos saceņseibys strītbolā, Daugovpiļs piļsātys finalsaceņseibys īlu basketbolā i svorbumbu ceļšonys saceņseibys, kuopšona radžu sīnā, bolkys i šautreņu svīsšona, kai ari basketbola sūda metīņu konkurss.

Daugovpiļs nūvoda dīnys reikoj Daugovpiļs nūvoda dūme sadarbeibā ar Kulturys puorvaļdi, pogostu puorvaļdem, SIA “Latvijas lauku konsultāciju un izglītības centra” Daugovpiļs nūdaļu, Daugovpiļs Universitati, Daugovpiļs piļsātys dūmi, Daugovpiļs Turisma informacejis centru, Latvejis Tierdznīceibys i ryupnīceibys kameru, Latgolys planavuošonys regionu, nūvoda uzjiemiejim i Eiropas sābru attīceibu i partnereibys instrumenta Latvejis – Lītovys – Boltkrīvejis puorrūbeža sadarbeibys programu 2007. – 2013. godam.

daugovpils nuvoda dinys

Komentari slāgti.