Luisa Kerola “Alise Breinumu zemē” latgaliski!

LaKuGa 17. Septembris, 2015. gods Comments Off on Luisa Kerola “Alise Breinumu zemē” latgaliski!

13. septembrī Rēzeknis Augstškolys (RA) aktu zalā nūtyka pasauļslavanuos Luisa Kerola gruomotys “Alise Breinumu zemē” latgalīšu volūdā prezentaceja.

2012. godā RA profesori Ilgu Šuplinsku uzrunuojs Abardinys universitatis profesors Deriks Maklūrs, kurs pīduovuoja iztulkuot L. Kerola gruomotu latgalīšu volūdā par gūdu tuos izīšonys 150 godu jubilejam. Tai kai projekts beja breivpruoteigs, tod profesionalus tulkus beja gryuši pīsaisteit, nu avanturai pīkryta Latvejis Kulturys akademejis studente Evika Muizniece i RA tulku programys absolvente Iveta Seņkāne. Tai ari aizasuoce ituos gruomotys topšona.

Atguojušajim gostim beja vareiba redzēt epizodi nu gruomotys nūdalis par “Trokū čaja dzeršonu”, kuru izspēlēja gruomotys redaktore I. Šuplinska, latgalīšu volūdys konsultanti: rakstnīks Valentins Lukaševičs, latgalistikys pietneica Sandra Ūdre i gruomotys tulkuotuoja Evika Muizniece. Latgalīšu gruomotys verseja ir unikala ar tū, ka piec kotrys nūdalis teik pīduovuota interaktivuo daļa, kurymā atlaseitys spēlis, kū varātu spielēt gruomotys skaiteituoji. Kluotynasūšī varēja pabyut pīaugušuo statusā i izspielēt atseviškys spēlis ari prezentacejā.

Kai nūruodeja gruomotys redaktore, tod L. Kerola “Alise” bierneibā nabeja juos meiluokuo gruomota, daudz vaira jū saistejuši Astridys Lindgrēnis dorbeigī, vitalī varūni. Sovukuort tulkuotuoja nūruodeja, ka itei gruomota jū bierneibā pat bīdynuojuse, nu korektore S. Ūdre pīkryta redzīņam, ka gruomota vaira dūmuota pīaugušajim.

Lels paļdis teik saceits vysim, kas dalyka rūku gruomotys radeišonā, ari Izgleiteibys, volūdu i dizaina fakultatis bakalaura studeju programys “Interjera dizains” 4. kursa studeņtem i programys direktorei Diānai Apelei, kurys vadeibā studeņtis izstruoduoja plakatu sereju gruomotai. Pasasokūt jom, mums preteimā iz gruomotys vuoka verās Češīrys kača sarkastiskais smaids (autore Zelma Kačkāne).

Gruomotys veiduošonys komanda sūlej pīduovuot prezentacejis pasuokumu ari vairuokom Latgolys regiona školom, partū, ka ir iņterese, rokstit ilga13@inbox.lv. Školu puorstuovi jau prezentacejis dīnā sajēme L. Kerola “Alisi Breinumu zemē” i cytus RA izdavumus kai augstškolys duovynuojumu.

alise breinumu zeme

Komentari slāgti.