Sastdiņ Leivuonā byus Leluo latgalīšu tautysdzīšmu kēde

LaKuGa 18. Septembris, 2015. gods Comments Off on Sastdiņ Leivuonā byus Leluo latgalīšu tautysdzīšmu kēde
Sastdiņ Leivuonā byus Leluo latgalīšu tautysdzīšmu kēde

Sastdiņ, 19. septembrī, Leivuonā sevkurs aicynuots īsasaisteit Lelajā latgalīšu tautysdzīšmu kēdē, kas nu 11.30 da 15.30 veisīs cauri Leivuona centralajai Reigys īlai.

Kai informej Leivuona nūvoda sabīdryskūs attīceibu i uoriejūs sakaru dalis puorstovi, pīsadaleit var sevkurs interesents naatkareigi nu vacuma – skaitūt (dzīžūt) tautysdzīsmis latgaliski, kai ari latvīšu literarajā volūdā, kod nu rūkys rūkā tiks nūdūts tautysdzīšmu komuļs, tai simboliski aplīcynojūt tautys gora spāku.

Kotrys akcejis dalinīks sajims eipašū dalinīka uzleimi. Tī, kas tautysdzīšmu kēdis dažaidūs pūsmūs byus nūskaitejuši vairuokys tautysdzīsmis, par kotru sajims zeimūdzeņu iz dalinīka uzleimis. Sakruojūt vaira par 5 zeimūdzenim, dalinīkim byus vareiba sajimt puorsteiguma bolvys – eipašys burtneicys ar latgalīšu alfabetu i pareizraksteibys lykumim.

Lelū latgalīšu tautysdzīšmu kēdi vysā tuos garumā kuplynuos ari vaira nakai 10 Leivuona nūvoda tautys muokslys i pošdarbeibys kolektivi, sovukuort pi Leivuona nūvoda Kulturys centra dorbuosīs Latgalīšu tradiceju škola, kurys rodūšajuos darbneicuos byus vareiba izmieginuot rūku mārrutku treišonā, svīksta neišonā, slūtu sīšonā i cytuos aktivitatēs. Dorbuosīs ari eipašuo Latgalīšu fotodarbneica, kurymā byus vareiba nūsabiļdēt tautystārpūs. Vysi pasuokumi byus bez moksys.

Lelū Latgalīšu tautysdzīšmu kēdi atbolsta Vaļsts Kulturkapitala fonds, a/s “Latvijas valsts meži” atbaļsteituo Latgolys kulturys programa 2015 i Latgolys regiona atteisteibys agentura projekta “Lielā latgaliešu tautasdziesmu ķēde un tradīciju skola – nemateriālā kultūras mantojuma saglabāšanai un popularizēšanai” ītvorūs.

Komentari slāgti.