Kolnasāta 19. septembrī

LaKuGa 20. Septembris, 2015. gods Comments Off on Kolnasāta 19. septembrī
Kolnasāta 19. septembrī

Cyuku miers nu 2014. goda juņa sātys cyukom atrosts Dagdys, Kruoslovys, Daugovpiļs, Cyblys i Rēzeknis nūvodūs. Tics ari da Vydzemis. Tok leluokuo daļa nūkautūs cyuku ir mozajuos saimisteibuos. Kaida ir cyuku miera ītekme iz ekonomiku, īrokstā skaidroj Dace Dambe.

Vuordineicā – par svešinīkim i tū, cik vīglai par taidu palikt Latgolā. Parkū nu svešuo beistuos, kas ir ksenofobeja, kas nūteik kinā “Svešī” i Albēra Kamī romanā “Svešinieks”? Arņs Slobožanins i Valentins Lukaševičs izstuosta ari tū, kū dora tod, ka zvona “nazynoms numers” voi cylvāks nu Japanys telefoniski pīduovoj nūpierkt akcejis.

Sovukuort leluo saruna nūtiks telefoniski, sasazvonūt ar dzīsmineicu i gleznuotuoju Daci Jangblūdi, kas sekuojuse mīlesteibai i niu kūpā ar sovu veiru dzeivoj ASV Misūri štatā. Latvejā Dace, tūreiz vēļ pavuordē Kaša, bārnim vuiceja gleznuot i spielēt afrikaņu bungys. Suoce raksteit muzyku i dzīduot, izdeve ari sovu pyrmū albumu “Ieskaujošais vairākums”. Sarunā Dace stuosta, ka Amerikā pīdzeivuojuse “kulturšoku” i Latvejis jai vys vēļ tryukst. Itūšaļt vaira roksta latgaliski, sovukuort angļu volūdā – vaira nā. Amerikā Dace vaira dasavārsuse gleznuošonai, tik niule īsajutuse i otkon suoc muzicēt. Ar veiru gaida sovu pyrmdzymtū i dūmoj, ka obeji kūpā varātu īraksteit šyupeļdzīšmu albumu.

Raidejumu klausīs ite.

Komentari slāgti.