Naujinē izskaniejs folklorys kūpu sasadzīduošonys pasuokums

Naujinē izskaniejs folklorys kūpu sasadzīduošonys pasuokums

13. septembrī Daugovpiļs nūvoda Naujinis pogostā, Juzefovys parkā, nu jau catūrtū reizi izskanēja folklorys kūpu sasadzīduošonys pasuokums “Atvasara Juzefovā”, kas itūgod nūtyka storptautiskuo folklorys festivala “Baltica” atskaņuos, informej Naujinis kulturys centra vadeituoja Olga Kuzmina.

Sasadzīduošonys svātki suocēs ar Svātū Mišu Jezupovys Sv. Pītera i Puovula Rūmys katuoļu bazneicā, piec kura kolektivu dalinīki puļcejuos Juzefovys parkā iz rodūšajom izdareibom – kabaču zaptis vuoreišonu ar povuoreiti Reginu Prohovsku, klugu peišonu ar Vyšku omotnīku cīma meistarem, lūka saušonu ar kūkomotnīku Vari Vilcānu i gazbetona kirba veiduošonu ar meistaru Valdi Grebežu. Kaids nu dalinīku itymā laikā lobpruotuok apsavēre Naujinis nūvodpietnīceibys muzeja pīduovuotuos ekspozicejis i izstuodis, cyts – vīnkuoršai baudeja saulainū laiku pateikamā sabīdreibā.

Pasuokuma turpynuojumā iz improvizātuos skotuvis – Juzefovys muižys pamatu – omuleigā atmosferā, par kū juopasasoka pasuokuma nomamuotei Ingai Zeilei, izskanēja koncerts. Sasadzīduošonuos svātku dalinīkus sveice Daugovpiļs nūvoda dūmis prīšksādātuoja Janina Jalinska i juos vieliejums “kab latgalīšu dzīsmis aizskaņ da pošu Juzefovys muižys parka kūku viersyutņu”, ruodīs, ir pīsapiļdejs. Vīnpadsmit kolektivi nu vairuoku nūvodu dalejuos ar sova nūvoda, dzymtuos vītys montuojumu – dzīsmem, daņčim, stuostim, anekdotim. Dzīsmēs tyka izdzīduotys vysaidys sadzeivis temys – kuozys, tolkys, Latgolys meitu dorba tykums, vacuokuos paaudzis dzīduotuoji deve padūmus demografiskuos situacejis izlobuošonai. Raitim sūlim Juzefovā tyka izdoncuoti “Ružovī daņči”, “Latgalīšu rokenrols” i cyti ļusteigi deju goboli.

Koncerta nūslāgumā pateiceibā par pīsadaleišonu pasuokumā kotrys kolektivs sajēme Latgolys regiona atteisteibys agenturys, Vaļsts kulturkapitala fonda i AS “Latvijas valsts meži” atbaļsteituo projekta “Folkloras kopu sadziedāšanās pasākuma “Atvasara Juzefovā”, vēsturiskā Juzefovas muižas parka un folkloras kopu atpazīstamības veicināšana un popularizēšana” ītvorūs radeituos kolektivu vizitkartis i brošurys par viesturiskū Juzefovys muižys parku, folklorys kūpu sasadzīduošonys pasuokumu “Atvasara Juzefovā” i folklorys kūpom, kurys tyka izveiduotys ar mierki pīsaisteit jaunus dalinīkus i veicynuot viesturiskuo Juzefovys muižys parka i folklorys kūpu sasadzīduošonys pasuokuma “Atvasara Juzefovā” atpazeistameibu Latgolys regionā i Latvejā.

Kolektivi sajēme ari Juzefovys uobeļu veinu, kurs tyka darynuots nu viņgod spīstuos uobeļu sulys i eipašū Juzefovys kabaču zapti, kura tyka gataveita tīpat Juzefovys parkā nu leidza atvastajim kabačim.

Pasuokuma nūslāgumā vysi baudeja eipašū kabaču zupu i leidza atvastūs gordumus – kabaču blīnus, kabaču ikrus, kabaču tortu i daudzus cytus iedīņus, kuru recepta pamatā ir kabacs.

Par pīsadaleišonu pasuokumā i Juzefovys parka pīskandynuošonu ar skaneigom dzīsmem pasuokuma reikuotuoji pasasoka Daugovpiļs nūvoda kolektivim – Naujinis kulturys centra folklorys kūpai “Rūžeņa” (vad. I. Zeile), Dubnys pogosta folklorys kūpai “Atzola” (vad. M. Umbraško), Ambeļu kulturys noma folklorys kūpai “Speiga” (vad. I. Skutele), Vabalis etnografiskajam ansambļam “Vabaļis” (vad. A. Uškāns), Daugovpiļs nūvoda kulturys centra folklorys kūpai “Dyrbyni” (vad. A. Briška), Daugovpiļs LKC folklorys kūpai “Dzīsme” (vad. L. Vaivode), Kruoslovys nūvoda kolektivim – Iudreišu pogosta folklorys kūpai “Rudzutaka” (vad. A. Tuče), Izvolta folklorys kūpai “Izvoltīši” (vad. A. Leikuma), Izvolta folklorys kūpai “Mozī latgalīši” (vad. S. Styvreņa), Vuorkovys nūvoda folklorys kūpai “Vecvārkava” (vad. R. Kairāns) i Īlyukstis nūvoda Bebrenis pogosta folklorys kūpai “Ritam” (vad. R. Kalvāne).

Naujinis kulturys centra kolektivs pasasoka Reginai Prohovskai, Varim Vilcānam, Valdim Grebežam i Vyšku omotnīku cīma meistarem, Naujinis nūvodpietnīceibys muzeja vadeituojai Evitai Kusiņai-Koļesnikai, Naujinis pogosta puorvaļdis vadeituojai Inārai Myglānei i darbinīkim par atbolstu i veiksmeigu sadarbeibu! Par finansialu atbolstu pateiceiba Latgolys regiona atteisteibys agenturai, Vaļsts kulturkapitala fondam, A/S “Latvijas valsts meži”, Daugovpiļs nūvoda dūmei i Naujinis pogosta puorvaļdei.

Print Friendly, PDF & Email

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
Mar
31
Svā
all-day Izstuode “Latgales keramikas stā... @ Daugovpiļs Muola muokslys centrs
Izstuode “Latgales keramikas stā... @ Daugovpiļs Muola muokslys centrs
Mar 31 all-day
Da 31. marta Daugovpiļs Muola muokslys centra izstuožu zālē apsaverama Tautys lītiškuos muokslys studejis “Latgale” izstuode “Latgales keramikas stāsti”, kurā apkūpuoti studejis lobuokī dorbi, viestej informaceja Daugovpiļs piļsātys sātyslopā. “Kotrys dorbs sovā byuteibā ir unikals i naatkuortojams, kotram[...]