Rēzeknē nūtiks pyrmais vargaņu muzykys festivals ORGANismi

LaKuGa 24. Septembris, 2015. gods Comments Off on Rēzeknē nūtiks pyrmais vargaņu muzykys festivals ORGANismi
Rēzeknē nūtiks pyrmais vargaņu muzykys festivals ORGANismi

Nu 24. da 31. oktobra Rēzeknē, Latgolys viestnīceibā GORS, nūtiks pyrmais vargaņu muzykys festivals “ORGANismi”, kura muokslinīciskuo vadeituoja byus varganiste Iveta Apkalna. Pyrmuo festivala temu īzeimēs jauns suokums i simboliska pasauļa radeišona.

Leidzeigi kai organismi, varganis ir sarežgeiti radejumi, kurim rakstureiga vīlu i energejis maiņa. Spielejūtīs ar vuordim “organ” (grīku vol. varganis) i “organismi”, festivala muokslinīciskuo vadeituoja Iveta Apkalna ir īceriejuse atkluot vēļ nanūjaustuos vargaņu i cytu muokslu, godsymtu, stilu saspielis vareibys.
Festivala dzimšonys īmasls ir digitalūs vargaņu “Johannus Eclessia” īguode 2014. godā. Ituo koncertinstrumenta atsarasšonys vīta Latgolys viestnīceibā GORS paver plašys vareibys na viņ vysvysaidu žanru i sastuovu muzykys atskaņuojumam, nu ari eksperimentim, jaunu sadarbeibys formu i skaniejuma vaicuojumim. Iveta Apkalna atkluoj: “Pyrmajā vargaņu muzykys festivalā “ORGANismi” radeisim pasauli. Taidu, kai stuosteits Vacuos Dereibys tekstūs, kaidu tū redziejs ituo muzykys instrumenta karaļs Johans Sebastians Bahs, taidu, kai sovu bierneibys dīnu apdzejuojumā atkluoj Rainis. Mes byusim līcinīki jauna festivala dzimšonys i radeibys šaļtei. Trejūs festivala koncertūs dzierdēsim i tradicionalūs žanrus i sastuovus – vargaņu solo, vargaņu i orkestra saspēle, i ari naparostuokys lītys – vargaņu i dejis improvizacejis koncertizruodi, teatralizātu Raiņa dzejis skaitejumu dzīdūšūs Rēzeknis bārnu, vargaņu i sytaminstrumentu pavadejumā.”

Festivala pyrmū koncertu 24. oktobrī 19.00 atkluos varganiste Iveta Apkalna i kamerorkestris “Sinfonietta Rīga” dirigenta Normunda Šnē vadeibā. Koncerta pyrmajā daļā byus vareiba baudeit I. Apkalnys vargaņu solo spēli, nu ūtrajā daļā koncertvarganista i kamerorkestra saspēli. Programā J. S. Baha i P. Hindemita skaņdorbi.

Varganists Ansgars Valenhorsts (Vuoceja) i Lilejis Liporys laikmeteiguos dejis kompaneja taipat kai Vacajā Dereibā festivala ūtrajā koncertā 27. oktobrī 19.00 pasauli radeis septeņuos epizodēs. Koncertu veidoj horeografe Lileja Lipora, gaismu muokslinīks Egils Kupčs i vargaņu improvizacejis dzims Ansgara Valenhorsta radeitys.

Raiņa dzejis muzykals skaitejums nu dzejis kruojuma “Saules gadi”, kuru 31. oktobrī 16.00 izspielēs i izdzīduos J. Ivanova Rēzeknis muzykys vydsškolys bārnu kors, sytaminstrumentu nūdalis audziekni i varganiste Iveta Apkalna. Koncerta veiduotuoji: režisore Muora Zaļaiskalns, telpa i tārpi Ināra Apele, dirigente Anda Lipska.

Festivalu reikoj Latgolys viestnīceiba GORS, atbolsta – Rēzeknis piļsātys dūme, Vaļsts kulturkapitala fonds, Latvejis Kulturys ministreja i A/S “Latvijas valsts meži”. Festivala reikuotuoji cer, ka ar Johannus Ecclesia īguodi i jaunuo vargaņu muzykys festivala izveidi Rēzekne i Latgolys viestnīceiba GORS sevi īzeimēs ari vargaņu muzykys pasauļa kartē.

Komentari slāgti.